Fakafo’ou vaa fengaue’aki ‘Aositelelia mo e SPC ^Featured

‘E tuku atu ‘e ‘Aositelelia ‘ene tokoni AUD $42.5 miliona ke fakapa’anga’aki ‘a e fatongia tefito ‘a e SPC ‘I he ta’u ‘e 3 ka hoko mai, ‘aia ko e poupou eni ki hono fakafo’ou ‘ena vaa fengaeu’aki kuo fakahoko mai ‘I he ta’u ‘e 10 mei he 2014-2023.

Ko e SPC ko e kautaha fakafeitu’u ‘oku takimu’a ‘I he fakalakalaka fakasaienisi mo fakatekinikale. Ko e talu hono fokotu’u ‘a e SPC ‘I Kenipela ‘i he 1947 mo e hoko ‘a ‘Aositelelia ko e memipa ‘o e kautaha.

Ko e ngaahi ngaue ‘oku fakahoko ‘e he SPC ‘oku kamata pe mei he mo’uilelei ‘a e kakai, ki hono pule’I ‘a e toutai, ako, fa’unga ‘o e fo’I mamani, totonu ‘a e tangata, fakalakalaka fakasosiale, vahevahe tatau ‘a fafine mo tangata, koloa fakanatula, feliliuaki ‘a e ‘ea mo e sitetisitika. ‘Oku toe kau ‘a e kautaha ni ‘I he laine mu’a ‘I he ngaue ‘a e pasifiki ki hono taliteke’i ‘a e COVID-19.

Na’e fakaha mei he Minisita ‘a ‘Aositelelia ki he Potungaue ki Muli mo e Potungaue ‘a e Kakai Fefine, Senatoa, Hon Marise Payne, ‘a ‘ene fiefia ke talitali lelei hono fakafo’ou ‘a e fengaue’aki koe ni mo e poupou ki he kautaha SPC, ‘i hono fatongia mahu’ingaange ‘I he kuonga ko eni ‘o e COVID-19, kau ai ‘a e kakai fefine mo e fanau fefine.

‘I he’ene fakamatala, ‘oku ‘iai ‘a e uesia lahi ‘a e COVID-19 ‘I he kakai fefine mo e fanau fefine ‘I he tapa kotoa ‘o mamani, kau ai ‘a e Pasifiki. ‘Oku ou ‘amanaki ki he ngaue fakataha mo e SPC ke fakapapau’i ‘oku  tokoni ‘a e kakai fefine moe fanau fefine ‘I he pasifiki ki he fakaakeake ‘a e feitu’u ni pea poupou ke toe malohiange ‘a e tu’unga ‘oku ‘iai hotau kakai mo ‘etau ‘ekonomika.

Na’e fakamalo’ia ‘e he talekita seniale ‘o e SPC, Dr Stuart Minchin, ‘a e ta’u lahi e fengaue’aki mai ‘a e kautaha ni mo ‘Aositelelia pea ne fakaha ko hono fakafo’ou ‘o e fengau’eaki koe ni, ko e fakamo’oni ia ‘a e ta’u lahi e poupou kuo fai ‘e ‘Aositelelia ma’ae SPC.

Na’a ne pehee ko e tukupa kuo fakaha ‘e ‘Aositelelia ‘I he’ene tokoni fakapa’anga fo’ou ko eni, te ne tuku mai ‘a e faingamalie ki he SPC ke hoko atu ‘ene tokoni ki he fakaakeake ‘a e Pasifiki mei he ngaahi nunu’a ‘o e COVID-19 ‘aki hono fakafepaki’I ‘a e ngaahi pole ki he fakalakalaka ‘a e ‘ekonomika, ‘atakai mo e mo’uilelei.

Na’e fakamo’oni ‘a e Minisita ki Muli, Marise Payne ‘I hono fakafo’ou ‘a e aleapau fengaue’aki ko eni ‘i ha fakataha na’e fakahoko ‘I he ‘initaneti mo e Dr Minchin mei he ‘ulu’I’ofisi ‘o e SPC ‘I Noumea, pea kau mai ki ai ‘a e Konisela Fakalangilangi ‘a ‘Aositelelia ki Niu Kaletonia, Alison Carrington.