Toe toloi fakafoki mai hotau kainga ne mo'unofoa 'i Fisi Featured
8 Siulai, 2020. Kuo toe toloi 'a e 'amanaki ke fakafoki mai 'a e ni'ihi hotau kainga na'e fihia 'i Fisi tupu mei he tapuni 'a e ngaahi kau'afonua tupu mei he fakataputapui COVID-19.
Kuo fakaha mei he Pule'anga koe toloi ko'eni ke fakahoko 'a e folau mai ko 'eni 'i he 'aho Tokonaki 11 'o Siulai 'a ia koe Tokonaki ia 'o e uike ni ka 'oku te'eki ai ke fakapapau'i mai ha taimi.
Na'e 'amanaki foki ke fakahoko 'a e folau mai ko'eni 'a pongipongi 'aho 9 'o Siulai ka 'oku mahino mai kuopau ke 'uluaki fakahoko hono sivi COVID-19 'a e kau pasese kimu'a pea nau toki heka ki he vakapuna.
Ko e 'amanaki fakahoko 'a hono fakafoki mai 'a e ni'ihi hotau kainga ko'eni kuo mahino mai kuo ma'u 'a e toko 3 fo'ou 'i Fisi 'e he Covid-19 pea koe toko 3 ko'eni koe kau Fisi foki mai mei Tu'apule'anga.
'Oku tuku mai foki 'e he ngaahi kautaha mitia fakavaha'apule'anga 'a e fakautuutu 'a e kaka ki 'olunga 'a e tokolahi 'o e kakai 'i mamani kuo ma'u kinautolu 'e he mahaki fakalilifu ni.
'Oku fai pe foki hono fehu'ia pe kuo mateuteu 'a Tonga ni ke talia ha ola 'e hoko 'i he polokalama ko'eni ka 'oku mahino mai pe 'oku fai pe mateuteu neongo hono fehu'ia 'eni.
