Kuo toulekeleka 'a e founga kemipeini 'a e PTOA ^Featured

'Oku ho'ata mai mei he'etau fakaofiofi atu ki he Fili Fale Alea 'o e ta'u ni 'a e toe taa mai pe 'e he kau taki mo e kau muimui 'o e paati 'ikai faka-'ofisiale koe PTOA 'a e fasi tau'olunga tatau ke fakatonu atu kiai honau kau muimui.

'I he vakai 'a e Kolomu Filihi ko e fa'ahinga fasi 'eni na'e fakatonu pea taha kiai 'a e katoa 'o e kau muimui 'o e PTOA lolotonga e kei laumalie honau taki ka kuo kehe 'eni kuonga he kuo mavaelahi e PTOA 'o kalasi kehekehe hange ha ngoue vesitapolo 'a ia 'oku 'i ai 'a e PTOA Siaosi Pohiva, PTOA Core Team, PTOA Global, PTOA International pea mo e fuluti salati pea kuo nau fefiohi 'o hafekasi, kuatakasi pea toe minikasi.

Ko e me'a ia 'oku fakaoli he 'oku lahi e kau muimui ia 'oku hee holo pea hange na'a nau mama kava taufua 'i he'enau fakaukau pe tenau tulaafale pe koe me'e pe tenau ma'ulu'ulu ki he fasi anga maheni he kuo hange ha mata'i taufale 'a e va'ava'a 'a e visone.

'Oku fu'u mahino kuo kamata 'aki pe fasi tau'olunga 'o e teu Fili Fale Alea 'i Novema 2021 'a hono tukuaki'i 'o e Hou'eiki mo e kau taki ki he faito'o konatapu pea mapuna fakataha mo e keini kilo 'e 14 na'e ma'u 'i Vava'u lolotonga ia 'oku te'eki ke ofi atu e fakatotolo ia 'a e kau polisi ki he mata kolo pea toe hulu atu ko e 'ikai ha fakamo'oni 'e tuku mai ka koe fakafalala he ma'u fakahaa, novena ho'ata malie mo e misi fakailifia.

Ko e peteni 'o e founga kemipeini tukuaki'i 'o e Fale 'o e Tu'i, Hou'eiki mo e kau taki 'o e fonua 'oku taha pe hono taumu'a ko e feinga ke faka'ita'i e kakai pea ke nau loto tangia mo taufehi'a ki he fa'unga lolotonga mo kinautolu 'oku ma'u 'a e mafai pea uesia ai mo 'enau fakakaukau ki hano fili fakapotopoto honau kau fakafofonga ki he Fale Alea.

Ko hono filihi 'e he Kolomu ni 'a e ngaahi mo'oni'i me'a na'e hoko pea na'a tau sio mata kiai na'e hoko pea 'oku lolotonga hoko 'o makatu'unga mei ai 'a e To Folofola hotau Tu'i 'ofeina ki he kakai kenau fili fakapotopoto 'a e kakai ki he Fale Alea.

Ko e ngaahi moveuevu, longoa'a mo e fetaufehi'a 'aki 'oku tofanga ai hotau ki'i fonua 'oku aka mei he fa'ahinga fasi tau'olunga ko'eni 'a ia na'e taumu'a pe ki he'enau hu ki Fale Alea ke veteki ' e fa'unga malu 'o e fonua kae pusiaki mai tokua 'a e temokalati kakato 'a ia 'oku longoa'a ai mo tau faka houa ai 'a mamani he ngaahi 'aho ni.

Kuo tuli hotau telinga he Tongasat, Paasipooti, Ongo 'Initia, Hou'eiki pea koe 'aho ni kuo taa'i mai e langi tau'olunga ko e faito'o konatapu pea 'omi mo e ngaahi hingoa.

'Oku lolotonga 'eke 'e Lord Tu'ivakano ki he Pule'anga 'o e 'aho ni 'a e pa'anga laka hake he 5 miliona ko e fa'ahinga founga kemipeini 'uli mo ta'efakahaisini natula pehe ni 'a e PTOA ka 'oku tau fakafeta'i he 'oku faito'o 'e he taimi mo e kuonga e me'a kotoa pea kuo maama 'a e kakai 'o e fonua.

'Oku te'eki ke ngalo he fonua 'a e lea mai 'a e Palemia kuo Pekia pehe ki hono foha he fono Mateni Tapueluelu 'oku nau 'ilo ki he kau 'ulu'i feke ka 'oku 'ikai ha mafai 'iate kinautolu lolotonga 'eni 'oku Palemia e tokotaha pea Minisita Polisi e tokotaha.

Kuopau pe ke mavahe hoto 'atamai mei he nomolo 'a mamani mo langi pehe ki lolofonua kae toki malava kete tui ki he fa'ahinga fakatuputupu langi pehe ni 'a ia 'oku toe unuhi mai ke hoko koe fakama'unga 'o e kemipeini 'o e ta'u 2021.

'I he lau 'a e Kolomu Filihi 'oku totonu ke 'uluaki fakama'opo'opo 'a e lotofale 'o e PTOA pea lingi 'esiti, seniola pea fakalili ha vaimafana pea 'oatu moha nepiseni 'o foo'i 'aki 'a e 'uli ke ma'a pea tu'u koe sino pe 'e taha 'o 'ikai hange ha pulu mofele kae malava ke fakatonu atu kiai 'a e kau muimui he koe me'a 'e hoko koe kau ifi 'aisi pe 'e tonu atu 'enau taimi ki he founga motu'a mo toulekeleka ko'eni pea kuo 'aa 'a e kakau hotau ki'i fonua.

Ko e movete 'a e PTOA he ngaahi 'aho ni 'o mata lahi hange ha saoa vaitupu ko e mahino ki he kau poupou koe 'ata 'oku nau tuli pea kuo aa 'a e kui 'o sio pea poto mo e vale 'o 'ilo.