‘Oku Punou ‘a Nu‘usila ki he Paati Kominiusi Siainá (CCP)? ^Featured

LONDON: Na‘e tafulu‘i ‘e he MP Pilitāniá, Bob Seele ‘i Westminster, London, ‘i he ‘aho 3 ‘o Mē, 2021, ‘a e lea na‘e fai ‘e he Minister Tu‘apule‘anga Nu‘usilá, Nanaia Mahuta, ki he Kosilio Siaina-Nu‘usilá ‘i he uike faka’osi ‘o ‘Epelelí. Pea poupou ki ai ‘a PM Jacinda Arden.

Pea na‘e kaumai mo e talēkita malu‘i ‘o e Australian Strategic Policy Institute, Michael Shoebridge, ki hono fakaanga‘i ‘o e pule‘anga ‘o PM Jacinda Arden. Ko e fakaanga‘i ‘o e pule‘anga Nu‘usilá ‘oku tupu mei he ‘enau mamafa ange ki honau vaha‘a politikalé mo e faka-pa‘angá mo Siainá ‘o fepaki mo honau mēmipa ‘i he talite ‘o e Five Eyes (Nu‘usila, ‘Aositelēlia, USA, Canada, UK).

Neongo na‘e ‘ohake ‘e Min. Mahuta ‘a e fiema’u ke mafola ange ‘a e ngaahi koloa hūkitu‘á ki Siainá ke kaumai ‘a e ngaahi fonua kehé, na‘á ne lave ai ki he ‘enau ta‘e-fiemālie ki hono fakaanga‘i mei he ngaahi fonua ‘o e Five Eyes. Pea na‘e poupou‘i ‘e PM Arden ‘a e lau ‘a Mahutá.

Na‘á ne fakatokanga foki ki he mālohi ‘o e ngaahi ngāue ‘a Siaina ‘i he ngaahi fonua mo e ‘otumotu ‘o e Pasifiki Sauté.

Ko e FIVE EYES  

Na‘e kamata ‘a e Five Eyes ‘i he 1946 hili ‘a e Tau Lahi ‘o Māmani II. Ko ‘enau ngāue sipai ‘o tānaki fakatotoló fakatahataha ‘a USA, UK, Kanata, NZ, mo Aositelēlia. Ka ‘ihe ngaahi ta‘u si‘i ki mui ní, kuo kaumai ki ai ‘a e ‘ekonōmiká, malu‘í, fakalao ‘o e Tekinolosia Lalahí, Totonu ‘a e Tangatá, mo e ngaahi vaha‘a faka-tu‘apule‘angá.

Pea ko e lau ‘a Min. Mahutá na‘e hangē kuo e‘a hake ‘enau fie tau‘atāina mei he taki ‘a e fonua lalahi ‘o e Five Eyes. Ko ia kuo nau fakatokanga mai na‘a ‘oku lolotonga melie‘ia ‘a Nu‘usila ‘i he ‘enau kai suka mei Siainá.    

“‘Oku ‘ikai kemau fiemālie ki hono fakalahimai ‘a e ngaahi tu‘utu‘uni ‘o e Five Eyes,” ko ‘ene lea ki he kau faiongoongó. “‘Oku mau faka‘amu ange kemau fekumi ki ha ngaahi faingamālie kehekehe ke fakahā ai ‘emau ngaahi fiema‘ú.”

“Ko e ngaahi fiema‘u ‘o hangē ko e Totonu ‘a e Tangatá ‘oku totonu ke fakahoko totonu mo ‘enau tui faka-‘Otua ‘a e pule‘anga takitaha.”    

Kai Suka ‘a NZ Mei Siaina?

‘Oku ngali fepaki ‘a e fakalaloa‘i ‘e PM Arden mo Min. Mahuta ‘a Siainá ko hono fakatanga‘i ‘e he Paati Kominiusi Siaina (China Communist Party) ‘a e lotu ‘o e Siasi Uyghurs mo honau kau mēmipá, pea mo hono to‘o fakaaoao ‘o Hong Kong.

Kuo fuoloa hono fakatanga‘i mo hono puke pōpula ‘o e kau mēmipá ‘o e ha‘a lotú ni, pea tukuaki‘i kuo mole ai ‘a e mo‘ui ‘a e tokolahi. Ko ia kuo lahi hono fakaanga‘i mei he ngaahi fonua ‘o e Five Eyes ‘a e Pule‘anga ‘o PM Jacinda Arden.

Kau ai ‘a e $30-piliona aleapau fefakatau‘aki ‘a e ongo fonuá kuo fakamo‘oni tohi kinaua ki he Comprehensive Strategic Partnershp and Regional Comprehensie Economic Partnership.     

Ko ia na‘e fehu‘ia ‘e PM Bob Seely ‘o e Fale Alea Pilitāniá na‘a kuo suka‘ia ‘a Nu‘usila kuo nau “huhu melie‘ia” (sucking up) ki Siaina?

“Ko e vahefā-‘e-taha (1/4) ‘o e sēini fetuku-koloa mai ‘a Pilitāniá kuo pule‘i ‘e Siaina,” ko e lau ‘a MP Seely. “Ko e palopalemá ‘o ka tau kei fononga atu ‘i he foungá ni, tetau a‘u ‘o hangē ko Nu‘usilá, ‘i he moveuveu ‘i heli ‘o e angatonú, mo e PM ‘oku ne lotu ‘aki ha ngaahi faka‘ilonga faitotonú lolotonga ia ‘oku ne komo-hinahuhu melie mei Siaina ko ‘ene holomui mei he aleapau ‘o e Five Eyes, ‘a ia ko ha me‘a sio-nounou palakū kenau fai.”

(Hokoatu Konga II uike kaha‘u: Ko e ‘Ētita Tu‘apule‘anga ‘a Sione Ake Mokofisi ‘o e Nepituno Tonga Online News. Na‘e kolisi tutuku mei Liahona High School pea ko e faiongoongo taukei ‘i he lea Tongá mo e lea Pilitāniá.)