Kuo mau pehē kuo CEO ‘a Claude Tupou he Potungāue Ako: Ngali hifo mai ha ‘Angelo ki he Lakanga ni? Featured
Kuo mau pehē kuo CEO ‘a Claude Tupou he Potungāue Ako: Ngali hifo mai ha ‘Angelo ki he Lakanga ni?
Neiafu
Vava’u
31 Ma’asi, 2016
Tangata’eiki,
Fakamolemole kae tu’u atu mu’a ‘eku ki’i fakahoha’a ni fekau’aki mo hono tataki kimautolu ko’eni he Potungāue ‘oku taku ‘oku mau tutu e maama ki he fonua pe koe Potungāue Ako. ‘Oku ‘ikai temau toe ‘ilo pe koe fē koaa ‘a e me’a ‘oku a’u kiai ‘a hono fakalele homau vaka he ko e fetongi tu’o fiha ‘eni ‘a e le’ole’o ‘i he lakanga CEO.
Na’a mau fanongo he ngaahi mītia kuo fokotu’u tu’uma’u ‘a Claude Tupou ki he lakanga ni hili ia ha tu’utu’uni ‘a e Va’a ‘oku fakahoko kiai ‘a e tangi ‘i he PSC pea na’a mau fiefia ‘i he’emau ‘ilo kuo ikuna e pule ‘a e lao mo e tu’utu’uni ngāue ka ta koaa ia na’e ‘oatu pe ‘a Claude ia ke le’ole’o he lakanga kae fa’o puha ‘a e fokotu’u ia ‘a e PSC fakatatau ki he lao.
‘Oku mahino pe ia ‘oku ‘i ai e mafai kiai ‘o e Minisitā Ako ka ko’ene tali koaa kae ‘oua kuo fuhu e Potungāue ‘i he fa’ahinga fokotu’utu’u pehe ni. Kuo toe ongona mai he ngaahi ongoongo kuo foki hifo ‘a Claude Tupou ia ‘o Tokoni CEO kae hoko hake ‘a Ponapate Taunisila ki he lakanga CEO. Ko e CEO le’ole’o ‘aki ‘eni hono 4 hili ‘a e malōlō ‘a ‘Emeli Pouvalu pea 'oku 'ikai ho'ata mei heni ha ma'opo'opo he 'oku fo'ou 'ene hoko he ngaahi 'aho ni.
‘Oku ‘i ai leva ‘a e fehu’i ‘oku nofo ‘i he’emau fakakaukau pe ‘oku ‘ikai koaa ha taha ia ‘e fe’unga ki he lakanga ni ‘i Tonga ni mo ‘etau kakai ‘i he Pasifiki?. Kapau leva ‘oku ‘ikai fe’unga ha taha pea ‘oku totonu ke uki e Potungāue ke fai ha uike lotu ‘o kole ha ‘Angelo ke hifo mei langi ‘o tongia e fatongia ni he ‘oku ‘ikai fe’unga ha taha ia ‘i he fonua.
Kapau leva ‘oku toe ‘i ai ha ‘uhinga kehe pea ‘oku matamata tonu ‘emau fifili pe koe tuai hono fili ha CEO kae faingofua ‘a e fokotu’utu’u faka lautohi Pule’anga ‘a ‘emau Minisitā mo ‘ene fanga pone ‘oku lolotonga fakahoko ‘i he Potungāue. ‘Oku mau faka’amu ke mahino ki homau Taki pea ke 'oua mu'a 'e tuputamaki ka ko e fokotu’utu’u ‘oku ne fakahoko ko hono veuki ‘ata’ataa pe ‘a e Potungaue na’a mau anga ki ai ‘i he maau mo hono toka’i ‘i Tonga ni mo muli pea na’e hohoko mai ‘a e kakai ‘iloa mo tu’unga fakaako ma’olunga na’a nau leleaki’i mai ‘a e maa’imoa ni.
Ko e me’a pe ‘oku mau ‘ilo he taimi ni koe launga ‘a e tokolahi taha ‘o e kau tauhi fānau pea mo e ngulungulu fei’umu ‘a e kau ngāue . Na’a mau fiefia ‘i he ongoongo ki hono fokotu’u ‘o Claude Tupou ki he lakanga CEO he koe tangata lelei ‘eni mo taukei ka koe me’a mahu’inga ko hono fakapapau’i aa ha taha ki he lakanga ni. 'Oku mau lotolahi ke mau lea 'o fakahā 'emau fakakaukau neongo hono lolo kimautolu. ‘Oku mo’oni e kananga koe lahi ange ‘a e kau heu ‘o e supo ‘e liliu leva ia ‘o hopi pea ‘e konaa ai pe Potungāue mo e kau ngāue kae ‘oua kuo hoko mai ha Pule’anga fo’ou.
Faka’apa’apa Atu,
Faiako Lolo Mo’oni
4 comments
-
Tuku a hoomou launga. Koe kau tama ki mua koe kau CE-go pe, ikai koe CEO. Nae tuai hono fknofo oe CEO kihe potungaue ako he oku iai e criteria ae PM oku miimui kiai. Koe fktatali ke ma'u ha taha pone temo nae manumi ki mua pea na kainga ke fkhu mai. Oku fiema'u ehe PM ha taha oku yes ma'u pe, kene fkfaingofuai e contract a Piukala mo Siaosi Pohiva ihe potungaue ako. Sai ke tau ilo.
-
Kou tui ko Siaosi Pohiva pe 'e fe'unga mo e lakanga CEO he Potungaue Ako pea ka hala ai pea vakai 'a Lavulavu he na'e tohi ki he lakanga CEO 'a e Ako ki mu'a...malie lahi Palemia...ka hala ke ma'u pea fakafisi e Palemia ki 'api mo e kovi ka tau sio ki he 'oho mai 'a e kakai lelei ke tokoni'i e ako..me'apango he 'oku 'ikai tali e kakai ia ko ia he Palemia he 'oku nau fu'u poto nautolu 'i ai...Malie 'Akili..
-
Kou tui au ka hoko ha fuhu mo ha tau he loto potungaue ko ene toki 'aa ia e fakakaukau e Palemia oku mooni e ngaahi mamahi oku hoko. Koe puta faitohi ia he media heikai pe ke toe ongo ia.
-
Ngali tonu ange ke hifo mai ha angelo mei langi. Koe kau 'eti faiva koena koe kau hiamatea kotoa. Ko Ponepate ena na'e suspend lau mahina koe manumi holo he ngaue, pea ko Koloti ena na'e 'osi reprimand 'ehe PSC 'o tu'u he lekooti koe manumi he pa'anga fakatau naunau 'ae CDU. Ka koe founga pe foki ia 'ae minisita ko eni mo 'ene ki'i pule'anga koe fili e kau faihia moe kau keisi ke fakalele e ngaahi ngaue 'ae pule'anga.
Ka 'oku mo'oni Faiako Lolo, koe me'a pe 'oku tau sio ki ai he taimi ni ko hono veteki mo faka'auha 'ehe palemia e potungaue ako moe ngaahi ngaue ne ta'u lahi hono fokotu'u mo mateaki'i 'ehe kau helo mo'oni 'oe potungaue. Hua mai a e himi putu kae fakaha'ele e potungaue ako 'o si'i tanu he kuo kamata ke si'i 'au'aunga mamalie.