Kau atu 'a Tonga ki he Fakataha ‘i he Vaha’a Kau Minisitā Polisi Pasifiki mo e Pule’anga Siaina
9 Tisema, 2023. ‘Oku lolotonga kau atu ‘a Tonga ki he Fakataha ‘i he vaha’a ‘o e Pule’anga Siaina mo e Ngaahi fonua ‘o e Pasifiki ‘i he tafa’aki ‘o e ngāue faka-Polisi (Second Ministerial Dialogue on Police Capacity Building and Cooperation).
‘Oku fakafofonga atu ‘a e Potungāue Polisi ‘a Tonga ‘e he ‘Eiki Minisitā Fefakatau’aki mo Langa Fakalakalaka Faka’ikonomika Hon. Dr. Viliami Uasike Latu pehe ki he ‘ofisa polisi pule ko ‘Atunaisa Taumoepeau pea mo e ‘ofisa kateti ko Lile Paongo.
Ko e ‘Eiki Palēmia Hon. Hu’akavameiliku ‘oku toe malumalu ai ‘a e Potungāue Polisi ka ‘oku lolotonga muimui folau atu he Tama Tu’i Tupou VI ki he fakataha COP ‘oku lolotonga fakahoko ki he United Emirates.
Ko e fakataha foki ‘aki ‘eni hono ua kuo fakahoko ‘i he vaha’a ‘o e Pule’anga Siaina mo e ngaahi fonua ‘o e Pasifiki pea kuo ‘uluaki fakataha na’e fakahoko ia ‘i he ta’u 2022 pea na’e fakahoko vituolo pe ia makatu’unga ‘i he fakataputapui ‘o e Koviti-19.
Fakatatau ki he fakamatala kuo ma’u mei he kau ‘ofisiale ‘a Tonga ‘oku kau atu ki he fakataha ni, ko e taumu’a ‘a e fakataha ni ko hono lalanga ha vā fengaue’aki ‘i he vaha’a ‘o e Pule’anga Siaina mo e ngaahi fonua ‘o e Pasifiki pea ke tokoni ki hono fakalakalaka’i ‘a e ngāue faka-Polisi ‘i he Pasifiki.
Na’e lava foki ‘a e fakataha ‘a e ‘Eiki Minisitā Hon. Dr. Viliami Uasike Latu mo e Tokoni Minisitā Polisi ‘a Siaina QI Yanjun (Vice Minister, Ministry Public Security) ‘i he ‘aho Tu’apulelulu ‘o e uike ni pea na’e fakahoko ai pe ‘a e ngaahi fiema’u ‘a Tonga pehē ki ha alelea ki hono fakamalohi’i ange ‘a e vā fengāue’aki ‘a e ongo fonua.
Na;e fakahoko foki he ‘aho Falaite 8 ‘o Tisema ‘a hono huufi faka’ofisiale ‘o e fakataha ni pea na’e me’a ai ‘a e ‘Eiki Minisitā Hon. Dr. Viliami Uasike Latu ‘o fakafofonga ‘a Tonga.
Na’e kau mai foki mo e ‘Amipasitoa ‘a Tonga ki Siaina Tau’aika Uta’atu ki he fakataha ko’eni fakataha mo e kau ‘Amipasitoa mei he ngaahi fonua ‘o e Pasifiki ‘oku nau ngāue ‘i Beijing ‘i Siaina ‘o takitaha fakafofonga hono fonua.
Kuo lave monū foki ‘a Tonga mei he ngaahi tokoni ‘a e Pule’anga Siaina pea koe fakataha fakata’u ko’eni ‘e malava ke toe ma’u faingamalie ai ‘a Tonga ki ha ngaahi tokoni mei he Pule’anga Siaina ‘e malava ma’u ai ha ngaahi me’angāue ke tokoni ki he Potungāue Polisi ‘a Tonga pehe ki he ngaahi poloseki fakalakalaka kehe pe..
‘Oku kau foki he fakataha ko’eni ‘a Ha’amoa, Vanuatu, Solomone, Cook Islands, Papua New Guinea pehe foki ki Tonga.
