Pekia 'Eiki Minisitā Ngoue Hon. Viliami Manuopangai Hingano Featured
'Eiki Minisitā 'o e Potungāue Ngoue, Me'atokoni, Ngaahi Vao'akau Viliami Manuopangai Faka’osiula Hingano
12 Sune, 2022. Koe ongoongo fakaloloma ia ki he fonua mo e Pule'anga 'a e hono fakahā faka'ofisiale 'e he 'Eiki Palēmia Hon. Hu'akavameiliku 'i he 'aho Tokonali 11 'o Sune ni 'a e pekia 'a e 'Eiki Minisitā 'o e Potungāue Ngoue, Me'atokoni & Ngaahi Vao'akau Viliami Manuopangai Faka’osiula Hingano.
Ko hono fakahā 'eni 'e he 'Eiki Palēmia na'e pekia 'a Hingano ka koe Fakafofonga Fale Alea 'o Ha'api 12 'i he Falemahaki 'Aokalani 'i Nu'usila 'i he 'aho Falaite 10 'o Sune ni.
Ko Hingano na'e fokotu'u ia 'e he 'Eiki Palēmia Hon. Hu'akavameiliku ki he lakanga koe 'Eiki Minisitā 'o e Potungāue Ngoue, Me'atokoni & Ngaahi Vao'akau 'i he 'aho 28 'o Tisema 2021 pea na'e taimi nounou mei ai kuo fakafolau fakafaito'o atu ki 'Aokalani 'o a'u mai ai pe ki he'ene pekia ko'eni.
Ko Hingano ko e 'Eiki Kōvana malōlō ia 'o e Vahefonua Ha'apai pea na'a ne hoko koe Fakafofonga Fale Alea ma'ae Vahenga Fili Ha'apai 12 mei he ta'u 2014 ki he 2017.
'Oku mahino mai 'e fakahā'ele mai 'a e pekia mei 'Aokalani 'i he 'aho Tu'apulelulu ko hono 16 'o Sune ni pea 'e fakahoko ai pe 'a e ngaahi ouau faka-Pule'anga kimu'a pea fakahā'ele atu ki he Makahokovalu ki 'Uiha.
'Oku ofongi ma'u 'a e fonua 'e he ngaahi taufa kafakafa 'oku hoko pea ko e tā 'eni 'oku ongo ki he fonua mo e Pule'anga pehe ki he Vahenga Fili Ha'apai 12.
Ko e pekia 'eni 'a Viliami Manuopangai Faka’osiula Hingano 'i hono ta'u 47 pea 'oku kei laumalie pe 'a e uitou mo e fanau paea.
ēūōīā
