Mo’ua e ‘Eiki Palemia he fokoutua KOVITI-19 ^Featured

‘E kei hokohoko atu pe ‘a e faifatongia ‘a e ‘Eiki Palēmia ‘o ngāue’aki ‘a e tekinolosia, ko e founga ngāue na’a ne taukave’i talu mei he tu’uta ‘a e Koviti-19 hotau fonua ni.

Ko e fatongia ‘o e Pule’anga ma’a e kakai ‘e hokohoko atu pē tautau tefito ki he fakaakeake mei he puna ‘a e mo’ungaafi pea mo e peaukula, kae ‘uma’a hono fakafepaki’i mo e fakasi’isi’i e uesia mei he mafola ‘a e Koviti19.

‘Oku lelei pe ‘a e ‘Eiki Palēmia, pea ‘oku ne tui ko e ‘uhinga pe ko ‘ene osi huhu tu’o ua pea toe huhu tokoni.

‘Oku ne fakalotolahi’i mai e Tonga kotoa ke nau lava atu fakakakato ‘enau huhu malu’i pea nau tokanga mo faka’apa’apa’i ‘a e fale’i fekau’aki mo e Koviti19 ‘a e Potungaue Mo’ui.

“‘Oku liliu ‘etau to’onga mo’ui mo ‘etau nofo ‘i he’etau ako ke tau lava ‘o nofo fakataha pe mo e Koviti19 pea ‘e hoko atu pe ‘eku fai fatongia ki He’ene ‘Afió, Pule’anga mo hotau kakai lolotonga ‘eku nofo mavahe fakatatau ki he tu’utu’uni ‘a e Potungaue Mo’ui”