Me'a 'a'ahi ‘Eiki Palēmia ki he kainga Nomuka ^Featured

Na’e me’a ‘a e ‘Eiki Palemia mo e Talafekau Lahi ‘o ‘Aositelēlia ki Tonga, HE. Ms Rachael Moore, ‘i he helikopeta Chinook mei he manuao ‘Aositelēlia.

Na’e me’a ‘a Hon. Hu’akavameiliku ‘o fakahā ‘a ‘ene fiefia ke a’utonu ki he kainga Nomuka, neongo na’e ‘osi ‘i ai e timi ‘a’ahi kimu’a ‘a e Pule’anga na’e taki ai ‘a e ‘Eiki Tokoni Palēmia mo e Minisitā Fonua mo e Ngaahi Koloa Fakaenatula, ka ko e faingamalie kuo tukuange mei he Pule’anga ‘Aositelēlia, ‘oku ne lau ko e tapuaki, ke siotonu ki he maumau na’e hoko mo vakai’i e tu’unga fakaakeake mo e teuteu ki he langa fo’ou ‘a e motu ni.

‘Oku mahino pe na’a tau ‘inasi tatau he fakatamaki he mapuna ‘a e mo’ungaafi, peaukula pea motuhia e fetu’utaki, ko ‘ene me’a ia. “ko ‘eku ha’u pē ke a’u tonu mai ke vakai’I e ngaue totonu ke fakahoko mo fakapapau’i pe ‘oku ‘ikai kemou li’ekina pea ‘oku fai pe ‘a e tokanga mai, ko e me’a ia mo e mafana ‘a Hon Hu’akamaveiliku.

Na’a ne fakamalō ki he Pule’anga ‘Aositelēlia mo e Talafekau Lahi ‘i he faingamalie kuo tukuange ke lava ai ‘a e ‘a’ahi.

Na’e me’a ‘a e Talafekau Lahi ‘Aositelēlia ‘o fakahā ‘a ‘ene fiefia he faingamalie ke a’utonu ai ki motu, ‘o mahino ‘a e tukunga totonu ne nau ‘i ai hili ‘a e fakatamaki.

‘Oku mafana hoku loto he sioatu kia kimoutolu, pea ’oku fakahā mai pe he tukunga ‘o e motu mo ho’omou fotu mai ‘a e taulofu’u ‘a e faingata’a ne mou fepaki mo ia, kamou kei fofonga malimali pe mo e fiefia, ko e me’a ia ‘a HE Rachael Moore.

Na’a ne fakaha ‘oku fiefia pe he’ene timi ‘oku ‘i he motu ke tokoni ki he fakama’opo’opo, ko e tokoni pe ia te nau ala fakahoko.

‘Oku kei ngaue ‘a e Pule’anga mo e kau ma’utofi’a ‘i he tukuimotu ke maau ia kimu’a pea toki kamata e langa fo’ou ki he ngaahi ‘api nofo’anga na’e holo mo maumau. 

Na’e kau mai mo e timi tokoni mei he Va’a Fakakautau ‘a Fisi ‘i he folau mai he HMAS Canberra ke tokoni he fakama’opo’opo ‘o e motu he uike ni.

‘E foaki atu mo e vaka he me’a’ofa mei Nu’usila mo e palau ko e me’a’ofa mei Siaina ‘i hono foaki ke tokoni ki Nomuka he ngaue fakaakeake.

 Lolotonga ia, ‘e ‘oatu mo e ngaahi tokoni hangē ko e lau’i kumala mo e kau’i manioke ke kamata tō ke tokoni ki he fakaakeake fakame’atokoni.

‘Oku kau mo e tokoni tangikē vai ke faka’inasi’aki ‘a e tukui’api ‘oku ‘ikai ha simavai pe na’e maumau he peaukula, tukukeheange ‘a e ngaahi ‘api langa fo’ou, he kuo mahino ‘e langa e fale fakataha mo e simavai.

Neongo e ngaahi fiema’u kotoa, ka na’e tokanga e kainga Nomuka ki ha fale hufanga ‘i he mo’unga ke fetukutuku ki ai e kainga ‘i ha toe fakatamaki tatau ‘i he kaha’u. ‘E vakai’i ‘e he Pule’anga ‘a e ngaahi faka’amu ko eni.

‘I he taimi tatau, na’e ‘omai mo ‘enau ngaahi fiema’u vivili, pea tali lelei ‘e he ‘Eiki Palēmia mo e loto hangamalie ke fai ha sio ki ai ‘a e Pule’anga.

Na’e muimui folau ki he ‘Eiki Palēmia, ‘a e ‘Eiki Minisitā Fefakatau’aki mo e Fakalakalaka Faka’ikonomika, Dr. Viliami Uasike Latu, MP Veivosa Taka, Fakafofonga Falealea ‘o Ha’apai 13 mo Faifekau Feke Mafi.

Na’e fakafe’iloaki ai mo e ongo tangata Tonga ‘oku na hoko ko e ongo faifekau he HMAS Adelaide mo e HMAS Canberra, ko Faifekau Sione Finau mo Faifekau Maumau Monu.