Tokoni $8 Miliona ‘Amelika Pangike ‘a Mamani ki Tonga Featured
Mrs. Natalia Palu latu, WB Liaison Officer, Hon. Tatafu Moeaki, Minister of Finance, Governor of the WB, Tonga
28 Sanuali, 2022. ‘Oku matu’aki hounga ki he Pule’anga ‘o Tonga ‘a e toupili mai ‘a e ngaahi ‘ofa mo e tokoni kāfakafa kotoa pe kuo lavengamalie ai ‘a e fonua, mei tu’apule’anga, ‘i he hili pe ‘a e Puna ‘a e Afi ‘i Hunga Tonga – Hunga Ha’apai he Tokonaki ‘aho 15 ‘o Sanuali, 2022.
Pea ‘oku tautautefito eni ki he Pangike ‘a Mamani, ‘i he Tokoni ko e Pa’anga ‘Amelika ‘e 8 Miliona, ke lava ‘a e Pule’anga, ‘o matatali ‘a e faingata’a fakafokifa, mo fakakake ‘a e fonua.
‘E lava ai ‘a e Pule’anga, ‘o matu’uaki ‘a e ngaahi mafasia’anga fakafokifa, pea fakafehokotaki mo e ngaahi tefito’i fatongia ne motuhia, mo tokoni’i ‘a e ngaah famili na’e uesia lahi taha ‘i he ngaahi naaunau tokoni, fale nofo’anga fakataimi, mo e fakalato ‘o e ma’u’anga pa’anga.
Ko e pa’anga tokoni eni na’e fakafou mai ‘i he Polokalama Tokoni Māhanga, ke fakalato ‘a e Patiseti, mo e Fa’unga Ngaue ki he Matu’uaki ‘o ha Faingata’a, ‘e mafeia ai ‘e Tonga ke ne faka’aonga’i ‘i ha hoko ha Fakatamaki.
Ko e me’angaue mateuteu ko ia, ‘oku ne faka’atā ‘a Tonga, ke fakaai ‘a e ngaahi fiema’u vivili, ‘i he taimi ‘oku fiema’u taha ai.
Na’e pehē ai ‘e he Minisita Pa’anga, Tatafu Moeaki:
“‘I he lava ‘o fakaa’u ‘a e ngaahi naaunau mo e pa’anga tokoni, ki he ngaahi famili, kau fefine mo e fanau, na’e uesia lahi taha, hili pe ha ‘aho ‘e taha, mei he hoko ‘a e fakatamaki, na’e oma tatau pe, mo hono a’utaki ‘o e ngaahi ma’u’anga vai inu, ki he ‘otu motu. Pea ‘oku lolotonga fai ‘a e tūkuingata, ke fakafehokotaki leva, ‘a e tekinolosia ‘o e fetu’utaki, pea mo e ‘otu motu mama’o.
Ko e vave ‘o hono ma’u ‘a e pa’anga tokoni ko eni, ‘oku lava ai ke talia, ‘a e ngaahi fiema’u vivili ‘a e fonua, pea to e ma’u ai ‘e he Pule’anga, ha loto-hangamalie, ke to e mateuteu ange ‘a ‘ene palani, ‘i he hili ‘a ‘ene matatali ‘a e faingata’a, pea mo hono fakakake ‘o e mo’ui.
Pea ‘oku mau fakamalo ai ki he Pangike ‘a Mamani, mo e loto hounga mo’oni, ‘i he taimi tonu ‘o ‘ene fakaai ‘a homau mafasia’anga”.
