Lava kakato ouau me'afaka'eiki 'o Lord Ma'afu Tukui'aulahi Featured
4 Sanuali, 2022. Na’e ‘afio ‘Ena ‘Afifio Tama Tu’i Kingi Tupou VI pehē ki he Ta’ahine Kuini Nanasipau’u Tuku’aho ‘i he ouau me’afaka’eiki ‘o Kenolo Lord Ma‘afu Tukui'aulahi ‘o ‘i he pongipongi ‘aneafi ‘aho 3 ‘o Sanuali 2022 ‘i he mala’e Huelo ‘o Hangai ‘i Tokomololo.
Na’a tataki hono fakahā’ele mai ‘o e me’afaka’eiki ‘e he ifi pehēki he konga kau mei he Kautau ‘a ‘Ene ‘Afio.
Na’e me’a foki ‘i he ouau ko’eni ‘a e Tama Pilinisi Ata, ‘Eiki Palēmia ‘o Tonga ki he Hou’eiki Mēmipa ‘o e Kapineti pea mo e fāmili mo e kainga ‘o e ‘Eiki Nōpele.
Ko e ouau mamalu ‘eni he na’e tālolo e kainga ‘o Lord Ma’afu he ve’ehala ‘o kamata pe ‘i Tokomololo ko ‘enau faka’apa’apa ki honau ‘Eiki Nōpele.
Na’e tefua hake ki he mala’e Hangai ‘o Huelo ‘a e kakai ‘e toko laungeau kenau fakamo’oni ki he fakahekeheka ‘a e folau ‘a e taha ‘o e kau mo’unga’i tangata ‘o e fonua ka koe ‘Eiki Nōpele ‘a ‘Ene ‘Afio.
Ko e pekia ‘eni ‘a Lord Ma’afu lolotonga na’a ne ‘i he lakanga Tokoni Palēmia ‘i he Pule’anga ‘o Dr. Pohiva Tu’i’onetoa pea na’a ne toe hoko foki ko e ‘Eiki Minisitā Fonua & Savea pehe ki he Kautau ‘A ‘Ene ‘Afio.
Na’e fai fatongia ‘a Lord Ma’afu ‘i he Kautau ‘A ‘Ene ‘Afio ‘i he ta’u ‘e 25 mei he ta’u 1975 ki he ta’u 2001 ki mu’a pea ne malōlō mei ai kuo a’u ki he tu’unga koe Lafitani Kenolo.
Na’a ne hoko ‘i he ta’u 2021 koe Sekelitali ki He’ene ‘Afio pea ne hoko ko e Fakafofonga Nopele ‘a ‘Ene ‘Afio ma’a e Vahefonua Tongatapu ki he Fale Alea ‘o Tonga ‘I he ta’u 2006.
Na’a ne hoko koe mēmipa ‘o e Kapineti ‘i he ta’u 2009 ‘o hokohoko mai ai pe ‘o a’u ko’eni ki he’ene pekia.
Na’e pekia ‘a Lord Ma’afu ‘i ‘Aokalani Nu’usila ‘i he ‘aho 12 ‘o Tisema 2021.
