Toloi ongo vakapuna na’e ‘amanaki ke tū’uta mai ‘i he mahina ni Featured
5 ‘Okatopa 2021. Kuo tu’utu’uni ‘e he fakataha’anga ‘a e Kōmiti ki he Ngaahi Me’a Fakatu’upakē mo e Kōmiti Fakafonua ki hono Tokangaekina ‘o e COVID-19 ke toloi ‘a e ongo vakapuna mei ‘Aositelēlia pea mo Nu’usila na’e ‘amanaki ke tū’uta mai ‘i he mahina ni.
Ko e vakapuna mei ‘Aositelēliá na’e palani ke ha’u mei Townsville ‘i ‘Okatopa 21 pea ‘oku toloi ia ‘o tali fanongonongo koe’uhi ko e tu’unga ‘oku ‘i ai ‘a e mafola ‘a e Covid-19 ‘i he vahe fonuá.
Ko e vakapuna mei Nu’usilá ‘a ia na’e fokotu’utu’u ke mavahe mai mei Christchurch ‘i he ‘Okatopa 20 ‘oku toloi ia ‘aki ha uike ‘e taha kae fakapapau’i mo vakai’i ‘a e ngaahi me’a kuo pau ke fakakakato (criteria) ‘e he tokotaha folaú kimu’a pea toki lava ke folau mai ki Tonga ni.
Polokalama Huhu Malu’i Covid-19
Kuo a’u ‘eni ki he toko 48,028 ‘a ia ko e 76% ‘a e kakai Tonga kuo ‘osi fakahoko ‘a honau huhu malu’i Covid-19. Ko e toko 27,615 leva mei ai ‘a ia ko e 44% kuo ‘osi fakahoko hoani ‘a honau huhu malu’í.
Fakatatau kia Toketa ‘Ofa Tukia mei he Potungāue Mo’uí, ‘oku taki mu’a ‘a e Vahefonua Niutoputapú ‘i he polokalama huhu malu’í koe’uhí kuo a’u ‘eni ki he 90% ‘a e kakai ‘i he motú kuo ‘osi fakahoko ‘a honau fuofua huhu malu’í (1st dose) hili hono luva atu ‘a e Polokalama Huhu Malu’í ‘i he uike kuo ‘osí.
Na’a ne fakahā ‘e hoko atu ai pē ‘a e Polokalama Huhu Malu’í ki Niuafo’ou ‘i he uike ni pea foki mai ai pē ‘a e polokalamá ‘o afe ‘i Vava’u ke fakahoko ‘a hono hoani ‘a e ‘uluaki huhu malu’í.
