Toloi teu tu'uta mai 'a e kau pasese mei Brisbane ^Featured

Fakatatau ki he tu’utu’uni ‘a e fakataha’anga, ‘e toloi ‘a e vakapuná ko ‘eni ‘i ha uike ‘e taha, ka e fai ‘a hono siofi ‘a e tu’unga ‘oku ‘i ai ‘a e mafola ‘o e vailasi ‘i he vahefonua ko eni.

Fakatatau ki he Pule Lahi ‘o e Potungāue ki he Ngaahi Ngāue Fakalotofonua Dr. Fotu Fisi’iahi, ‘e tū’uta mai pē ‘a e vakapuna ‘apongipongi, ka ko e vaka koia ke fakafolau atu ai ‘a e kau ngāue toli fua’i’akau ‘e toko 60 ‘o ‘ikai ke ‘iai ha pasese ‘e heka mai ai ki Tonga ni.

Na’e fakahā foki ‘e he Pule Lahi ‘o e Potungāue MEIDECC Paula Pouvalu Ma’u, ‘e tū’uta aipe foki ‘apongipongi ‘a e vakapuná ia mei Nu’usila mo e kau pasese ‘e toko uangeau fāngofulu tupu. Ko e kau pasese ko ‘eni ko e tokolahi taha ai ko e ni’ihi na’a nau fakakaungatamaki ‘i he polokalama toli fua’i’akau.

‘E fakahoko ‘a hono fakamavahe’i makehe (quarantine) ‘o e kau pasese ko ‘eni ‘i Tanoa pea mo Makeke. ‘Oku ‘i he tu’unga fakafiemālie pē ‘a e kau pasese koia na’a nau folau mai mei Vanuatu ‘i he uike kuo ‘osi, ‘a ia ‘oku lolotonga fakamavahe’i makehe kinautolu ‘i he Kemi Taliai. Fakatatau ki he Pule Lahi ‘o e Potungāue Mo’ui Toketā Siale ‘Akau’ola na’e ‘osi fakahoko ‘a ‘enau fuofua sivi covid-19 pea na’e mahino mei ai ‘oku nau hao kotoa pē.

Tu’unga ‘oku ‘i ai ‘a e lesisita

Fakatatau kia Paula Ma’u ko e toko 2800 tupu ‘eni ‘a e tokolahi kuo nau ‘osi lesisita mai ki he polokalama ki hono fakafokifoki mai hotau kāinga Tonga tukuvakā ‘i he ngaahi fonua muli. Ko e toko 2700 leva ‘a e kāinga Tonga kuo ‘osi fakafokifoki mai ‘o kamata mei Siulai ‘o e ta’u kuo ‘osi.

Tu’unga ‘oku ‘i ai ‘a e Covid-19 ‘i Fisi

Na’e fakahā ‘i he fakataha ‘o e ‘ahó ni, ‘oku ‘i ai ‘a e tokotaha Tonga ‘oku ne fokoutua ‘i he vailasi Covid-19 ‘i Fisi. Fakatatau ki he lipooti mei he Potungāue Mo’ui, ‘oku tokangaekina ‘a e tokotahá ni pea ‘oku ne ‘i he tu’unga fakafiemālie pe.

‘I he fakamatala ‘a Paula Ma’u, ‘oku fai pē ‘a hono tokonia ‘a e kau pasese Tonga ‘oku nau lolotonga ‘i Fisi na’a nau folau mai mei ‘Amelika. ‘Oku ‘i ai ‘a e ni’hi ‘o e kau pasese ko ‘eni na’a nau ‘osi folau hake kinautolu ki Nu’usila ‘a ia tenau kau nautolu he foki mai ‘i he vakapuná ‘apongipongi.

Huhu Malu’i Covid-19

Kuo a’u ‘eni ki he toko 1125 kuo nau ‘osi kau atu ki he polokalama huhu malu’i Covid-19 hono tu’o ua. Fakatatau kia Toketā Siale ‘Akau’ola, ‘oku ‘i ai ‘a e taumu’a ke a’usia ‘a e peseti ‘e 70 ‘o e huhu malu’i ‘i he ‘ene a’u ki Tisema ‘o e ta’ú ni.

Na’a ne tapou aipe ki he kakai ‘o e fonua, kuo ‘osi kamata ‘a e takai hono ua ‘o e huhu malu’i. Ko kinautolu na’e ‘osi huhu ‘i he huhu ‘uluaki, ke nau fakaofiofi ke fakahoko ‘a ‘enau huhu hono ua.