Kei hao pē ‘a Tonga mei he Covid-19 ^Featured

Fakatatau ki he Pule Lahi le’ole’o ‘o e Potungāue Mo’ui Toketā Reynold ‘Ofanoa, ‘oku hao kotoa pē ‘a e ni’ihi ko ‘eni ‘o ‘ikai ha taha ‘e ma’u ‘e he vailasi Covid-19.

Ko e kau pasese eni na’a nau tū’uta ‘i he uike ‘uluaki ‘o e mahiná ni mei Nu’usila pea mo Ha’amoa, Ha’amoa ‘Amelika.

Ngaahi vakapuná ki Sune

Na’e fakahā ‘e he Pule Lahi ‘o e Potungāue MEIDECC Paula Pouvalu Ma’u ki he Fakataha’anga ‘a e Kōmiti Fakafonua ki he Ngaahi Me’a Fakatu’upake (NEMC) pea mo e Kōmiti ki hono Tokangaekina ‘o e Covid-19 ‘oku ‘amanaki ke tū’uta ‘i he uike kaha’u Sune ‘aho 2-3 ‘a e vakapuná ‘e tolu.

Ko e vakapuná mei Nu’usila ‘e tū’uta ia ‘i he ‘aho 2 pea tū’uta leva ‘a e vakapuná mei ‘Aositelelia ‘i he Sune ‘aho 3. ‘Oku ‘i ai foki vakapuná mei Fisi ka ‘e toki fakapapau’i ia mei he Potungāue Mo’ui.

Tu’unga ‘oku ‘i ai ‘a e huhu malu’i Covid-19

Kuo a’u eni ki he toko 28150 ‘a e ni’ihi kuo nau huhu ‘i he huhu malu’i ‘o e Covid-19. Na’e fakahā ai ‘e Toketā ‘Ofanoa kuo ‘osi a’usia ‘a e taumu’a, ke a’u ‘a e tokolahi ki he 28000.

‘Oku ‘i ai pē ‘a e ngaahi feitu’u ‘oku faka’amu ke a’u ki ai ‘a e huhu malu’i ‘i he uiké ni, ‘a ia ‘oku kau kiai ‘a e motu ko ‘Eueiki pea mo ‘Atatā.

Na’á ne fakamālo’ia aipe foki mo e fetokoni’aki ‘oku fakahoko mei he kakai ‘o e fonua, ke fakakakato ‘a e fatongia ko eni.