Toloi kotoa ngaahi vakapuna 'amanaki tu'uta mai uike kaha'u Featured
21 ‘Epeleli, 2021. Kuo tu’utu’uni ‘a e Kōmiti Fakafonua ki he Ngaahi Me’a Fakatu’upake (NEMC) pea mo e Kōmiti ki hono Tokangaekina ‘o e Covid-19 ke toloi katoa ‘a e ngaahi vakapuna na’e palani ke tū’uta mai ‘i he uike kaha’ú mei he ‘aho 28 -30 ‘o ‘Epelelí.
Fakatatau ki he Pule Lahi ‘o e Potungāue MEIDECC Paula Pouvalu Ma’u, ‘e toloi ‘a e ngaahi vakapuna ko ‘ení ki he ‘aho 4-6 ‘o Mē.
“‘Oku makatu’unga ‘a e toloi ko ‘ení kae ‘oleva ke fakapapau’i ‘a e tu’unga ‘oku ‘i ai ‘a e vailasí ‘i Fisi, pea mo hono kaniseli mai ‘o e vaka mei Brisbane.”
Ko e vakapuna ‘e fā na’e ‘amanaki ke tū’uta mai ‘i he uike kaha’u ko e vaka mei ‘Okalani Nu’usila, Fisi, Pangopango pea mo Brisbane.
Ko e vakapuna pē ‘e tolu ‘e tu’uta ‘i he uike ‘uluaki ‘o Mē, ko e vaka mei Nu’usila, Fisi pea mo Pangopango.
