Fakana'ana'a Featured
Mo'unga Talau mo e Taulanga Puatalefusi
Fakana‘ana‘a
Fatu ‘ehe punake Vava‘u ta‘e‘iloa
(Koe faiva ta‘anga fakana‘ana‘a)
1. Ka malū pea tau ē kakapu
‘Ihe ‘otu motulalo ‘o Vava‘u
Pea hangē pē ‘oku te folau
Kau viki hangafia atu
5. Neu tu‘u he toa ‘i Longomapu
Tepa ki he Fakafanua‘amanu
Kihe utu mai ‘ae mo‘unga ko Talau
Moe konga vao ‘i Pāhalau
‘Ohuafi langa‘ia ‘ehe hahau
10. Kuo tulekina ‘ehe Tokelau
‘O tokoto hifo ‘i Tolungahaku
Falefata moe Hala Malumalu
Kalo ki Koloa moe ‘Otufangavalu
‘O mamata he loto ko ‘Utuuafu
15. Ha‘u tā tūkua ē Hala Ngutungutu
Kata kalo ki Tulukingavava‘u
Mo si‘i hifonga ‘i ‘Anaefu
Fanongoa mei ‘Anapupu
Si‘i ngala ‘ae ‘Utukalongalu
20. Fakapō kuo langa ‘a ‘atu
Kuo fakalolo ki tokelau
Kuo kapa talifaki ‘a manu
‘I Tu‘ungasika mo Luafatu
Luamoko moe motu ko Kitu
25. Si‘i falō ‘ae mo‘unga ko Vou
Kuo tafitonga ‘ehe malū
Uoi seuke! Na’a koha mala
Hoto ‘ofa ki Vava‘u kuo langa
He fonua ne ngali kātoanga
30. Na‘e ngana pē kiai e tala
‘Ihe lautele moe folivaka
Mo hono lelei fai ‘eva‘anga
Kapau ha Ha‘afuluhao hena taha
Pea ha‘u mu‘a ‘o fanongo he ta‘anga
35. Viki ka tō lulunga
‘Alo ‘i tu‘a Hunga
Ka ko Totokafonua
Teu tu‘u ‘i Tauta ‘o mamata ki Taula
Mo si‘i siale ‘o Mu‘omu‘a
40. Ha maau koe ‘e ‘ikai a matatua
Ko loto ke tuku ‘a Tongatapu
Moe Matahangale kau ‘alu
Koe ‘uhi ke lelu ai si‘oku ‘ofa
Kihe liku ‘i Matuanua
45. Si‘i manusiu ē ‘ene ngā
Koe mohe ‘apē ē ki Liku‘ā
Kae ‘ā kihe Fonongatoa
‘O sio hifo he Toalofa
Kihe mapuna hake ‘ae la‘ā
50. ‘Ihe hake‘anga ‘o Lepuhā
Kau hake hē ki Maluhola
Kau hifo ki Finekahoafa
‘O toli he vao kulukona
Ke ‘omi ke fehu‘iekina ‘e taha
55. Maama teunga fakaNiua
Ke ngangatu hotau pōhiva
Koe Ki’i Fakamatala Nounou:
‘Oku taku ‘o pehē na‘e fatu ‘ehe punake Vava‘u ta‘e‘iloa ‘ae ta‘anga fakana‘ana‘a ko ‘eni, ‘o pehē koe fa‘u kihe fānau ‘ae ‘eiki lahi mei Vava‘u na‘a nau folau ki Tonga Tapu, Tonga ‘Eiki mo Tonga Lahi he‘enau tangi koe ta‘elata, ‘ofa moe manatu ki Vava‘u Lahi mo hono fakalata, fakaholomamata moe faka‘ofo‘ofa hono ‘otu mātanga, ‘otu fanga, ‘otu ‘ana moe ’otu mo‘unga.
‘Oku kei tolonga mai ‘ae tukufakaholo fakafatu ta‘anga viki he kau punake ‘o Vava‘u Lahi, ‘o hangē ko ‘ene ‘asi he taha ‘oe ngaahi maa‘imoa faiva ta‘anga ‘ae Ta‘ahine Kuini ‘Ofeina ko Sālote, “‘Otu Ha‘apai fietanagata, Tu‘u ‘a Vava‘u he mātanga.” ‘Oku lahi ‘a Ha‘apai he fietangata, tau‘akitangata moe to‘a kae lahi ‘a Vava‘u he māfana, viki moe to‘a.
‘Oku lahi ‘ae fa‘ahinga kehekehe ‘oe ta‘anga, ‘o hangē koe ta‘anga viki, ta‘anga tengihia (ta‘anga tutulu), ta‘anga kakala (ta‘anga ‘ofa) mo e ta'anga fetau, ‘aia ‘oku kau ai ‘ae ta‘anga fakana‘ana‘a, ‘o tefito hono fakana‘ana‘a ha tangi ‘aha taha ha‘ane mamahi moe ta‘elata koe tupu mei he ‘ongo‘i ‘ofa moe manatu.
‘Oku ngāue‘aki lahi ‘ehe punake ni ‘ae heliaki fakafekauaki (associative, metaphoric heliaki) kae si‘i hono ngāue‘aki ‘ae heliaki fakafetongiaki (gualitative, epiphoric heliaki), ‘aia ‘oku lahi hona ngāue‘aki he faiva ta‘anga, faiva lea moe tufunga lea.
‘Ofa ma‘u moe ‘ānau fau,
Hūfanga Dr Ōkusitino Māhina
Professor of Art, Culture and Critical Anthropology
Tonga International Academy &
Vava‘u Academy for Critical Inquiry and Applied Research
1 comment
-
Si'oto'ofa 'Etita:
Kataki 'ala he fakahela moe fakaongosia kae toe fai atu pe mu'a ha toe tanaki kihe fua moe motu'a huluhulu moe kinikini nounou na'a ku feia kimu'a he ta'anga "Fakana'ana'a" kihe kau lautohi nusipepa 'onilaini na'a nau faka'ekea mo fakafehu'ia 'ae ngaahi 'uhinga na'e 'ikai fu'u maamangia mo mahinoa, 'o hange koia 'oku fakalau mo fakaha atu 'i lalo.
'Oku matamata na'e fua 'iloa mo hingoa 'a Tonga ko Tonga mei sio 'a Fisi mo Ha'amoa ko 'ene tu'u he Tonga 'o Fisi mo Ha'amoa hili 'ae fua tau'ataina 'a Tonga mei he Pule'anga Hau moe pule 'ae Tu'i Manu'a mo Ha'amoa pea mo tau'ataina 'ae Tu'i Manu'a mo Ha'amoa mei he Pule'anga Hau moe pule kimu'a 'ae Tu'i Pulotu mo Pulotu (Tu'i Fisi mo Fisi).
('Oku ma'u mei he talatukungu [moe talatukutohi he ta-va ni] koe hingoa fakatenetene, fakapunake pe fakaheliaki 'o Fisi ko Pulotu, Ha'amoa ko Langi mo Tonga ko Maama).
Na'e hoko 'ae taulahi moe lingitoto fakavaha'afonua he vaha'a 'oe Tu'i Manu'a mo Ha'amoa mo Tonga, 'aia na'e takitau ai 'a 'Aho'eitu, 'o 'ikuna pea hoko ai koe fua Tu'i Tonga, 'aia na'e 'omai fakapopula ai 'ae kau Fisi moe kau Ha'amoa, 'o hoko koe kau lahi moe kau mu'aki 'oe Pule'anga Hau 'oe Tu'i Tonga.
Na'e taku he talaefonua na'e tamai Ha'amoa koe 'Otua mo fa'e Tonga koe 'Eiki 'a 'Aho'eitu, 'aia na'e hoko ai koe 'Otua moe Tu'i, 'o tupu 'ene tapu/toputau mei hono konga 'Otua pea tupu 'ene 'Eiki mei he'ene Tapu. 'Oku ngalingali koe liliu'anga ia 'ae hingoa Tonga kihe Tonga Tapu, Tonga 'Eiki moe Tonga Lahi, 'o 'uhinga koe motu lahi ko Tonga koe motu 'oku Lahi he Tapu moe 'Eiki, 'o 'iloa leva ko Tonga Tapu (Tongatapu), Tonga 'Eiki (Tonga'eiki) moe Tonga Lahi (Tongalahi) he na'e fakapitenga ai 'ae hou'eiki lalahi kae tefito kihe Tu'i Tonga.
('Oku matamata koe 'uhinga lahi ia 'oe hingoa 'oe motu ko Niua Toputapau [Niuatoputapu; Niua faliunga tapu] kihe 'Otua-mo-Tangata [moe 'Eiki Lahi] ko Seketo'a koe tamai 'a 'Ilaheva ('o 'uhinga kihe talavou moe hoihoifua lahi), 'aia na'e tukua mai 'i Vava'u mo Ha'apai ki Popua 'i Ma'ofanga/Ma'ufanga 'i Tonga, 'o lili ai ko Va'epopua (Va'e-'o-Popua) koe "heva"/"ope" atu hono talavou moe hoihoifua).
'Oku toe 'otau heni moe fakatata kihe ongo fa'ahinga 'e ua 'oe heliaki kuo feia hono fakafaikehekehea, 'aia kuo fakafa'ahinga koe (1) heliaki fakafetongiaki (qualitative, epiphoric heliaki) -- 'aia koe "fakafetongiaki 'ae anga/'ulungaanga 'oe ongo me'a 'e ua -- 'o hange koe "la'ato" moe "ungafonua 'ae la'a" kihe "mate" moe "tu'i" -- moe (2) heliaki fakafekauaki (associative, metaphoric heliaki) -- 'aia koe "fakafekauaki" 'ae "anga"/"'ulungaanga" 'oe ongo me'a 'e ua -- 'o hange koe "kulukona 'o Tavakefai'anga" kihe "'eiki-moe-to'a ko 'Ulukalala 'oe kolomko Tu'anuku."
'Oku lahi fau hono ngaue'aki 'ehe punake 'oe ta'anga fakana'ana'a koe "Fakana'ana'a" 'ae heliaki fakafekauaki (associative, metaphoric heliaki) he'ene ngaue'aki 'ae heliaki fakafetongiaki (qualitative, epiphoric heliaki), 'o hange ko 'ene ha he kohi/laini 50-56 'i lalo.
50. ‘Ihe hake‘anga ‘o Lepuhā
Kau hake hē ki Maluhola
Kau hifo ki Finekahoafa
‘O toli he vao kulukona
Ke ‘omi ke fehu‘iekina ‘e taha
55. Maama teunga fakaNiua
Ke ngangatu hotau pōhiva
'Oku ne ngaue'aki 'ae hono tui 'oe kulukona he hake'anga 'o Lepuha he Maluhola moe Finekahoafa ke tui ha kakala ke fehu'iekina mo luva kiha 'ofa'anga koe heliaki fakafetongiaki (qualitative, epiphoric heliaki) pea mo Lepuha, Maluhola moe Finekahoafa 'oe kolo ko Leimatu'a koe heliaki fakafekauaki (associative, metaphoric heliaki).
Koe ngatanga e si'ete lave
Kae vetea si'eta talave
Kau afe he kuo malave,
'Ete 'ofa vale ki Vava'u e
Ongo 'i loto pea lalave
Moto si'eta kovinanite
Fakama'u koe talite
Tapula ke vete 'e mate
ANFF leva e malanga kae a'u,
'Ofa fau moe na'una'u
Hufanga