Tautea Ngāue Pōpula ongo 'Ofisa Polisi koe fakalavea lahi

Na'e tautea 'a e ongo tangata ni 'i he Fakamaau'anga Lahi 'i Nuku'alofa 'e he Tu'i Fakamaau Lahi Le'ole'o Justice Petunia Tupou kena ngaue pōpula taki ta'u 'e ua.

Ko e tautea 'eni 'a e ongo matāpule ni ki he hia na'a na fakahoko 'i he 'Apitanga Polisi 'i Neiafu 'i he 'aho 26 'o Sune ta'u 2021 'a ia ko'ena 'aka 'aki hona su safety 'a e 'ulu 'o 'Isileli Latu 'o hoko ai 'a e lavea lahi ki hono fofonga mo hono 'ulu.

Fakatatau ki he fakamatala 'i hono hilifaki 'o e tautea ni na'e konā atu 'a e mamahi 'i he toumu'a 'o e 'Apitanga Polisi mo e Tamate Afi 'i Neiafu 'o hoko ai ha'ane felauaki moha tokotaha kehe pea na iku tukufetuli 'a e mamahi mo e tokotaha ko'eni 'o lele 'a e tokotaha ko'eni ki he 'Apitanga Tamateafi. 

Na'e ngāue mai ai 'a Latu mo Tapueluelu ki he mamahi pea hoko ai 'a 'enau fefusiaki mo e faingata'a hono feinga'i 'a e mamahi pea iku 'o loka'i pea na'e hoko 'a e tā fakalavea ko'eni 'i he taimi na'e 'ave ai ke fakahū he pilisone.

Na'e hilifaki 'a e tauetea 'i he fokotu'u mei he Talatalaaki makatu'unga he lahi 'o e lavea na'e hoko ki he mamahi mo e 'ikai ha lekooti faihia 'o e ongo faka'iloa.

Na'e fokotu'u 'e he Talatalaaki ke kamata 'a e tautea 'i he ta'u 'e 4 pea to'o leva mai ai 'a e mahina 'e 12 koe 'ikai ha lekooti faihia pea toloi leva 'a e mahina 'e 12 faka'osi ke 'oua na'a na toe fakahoko ha hia he fo'i vaha'a taimi koia.

Ko e ta'u leva 'e ua na'e tu'utu'uni 'e he Fakamaau'anga ke ngāue'i 'e he ongo Faka'iloa 'o kamata mei he 'aho 8 'o Ma'asi 2024.

Kuo 'osi 'i ai mo e ongo 'ofisa polisi 'i Vava'u na'e fakamalōlō'i kinaua kimu'a atu pea na'e tautea ngāue popula ki he tā fakalavea ai pe 'a ia 'oku 'i ai 'a e tokanga makehe kiai 'a e Fakamaau'anga.