Fakatokanga fekau’aki mo e ngaahi founga kākā mo loi ʻi he ʻinitaneti´ ^Featured

Kuo 'alu ke fakautuutu ange e ngaahi founga ‘initaneti kākā mo loi (online scammers) ‘oku´ ne tohoaki‘i e tokanga ʻa e tangata mo e fefine‘i fonua Tonga´, ‘o feinga ai ha niʻihi ke nau ma‘u ‘a e pa‘anga ‘a hotau kakai´ ‘i he founga kākā.

ʻOku kau ʻi he ngaahi founga kākaa´ ni (scammers) ʻa e:

1) Fefakatau‘aki kākā ‘i he ‘initaneti´

Neongo ʻoku angamaheni pē ʻa e fefakatau‘aki ʻi he ʻinitaneti´ (online shopping), ko e founga ‘oku ngāue’aki ‘e he ni’ihi feinga kākaa, ko e tuʻuaki ʻo ha ngaahi koloa (ʻoku
ʻikai ke nau maʻu), ke fakatau atu pea nau kole leva ha tipōsiti pē totongi kimuʻa pea toki ʻomi ‘a e koloa ko ia´.

2) Ngaahi fakamatala fakafoʻituitui (profile) loi ʻi he ʻinitaneti´ ke faʻu ʻaki ha vā feʻofaʻaki pē kole tokoni. ‘Oku faʻa ngāue‘aki ‘e he ni‘ihi feinga kākaa´ ni, ‘a e ngaahi founga ‘initaneti (online) ke ‘i ai hano vā fakakaumeʻa fe‘ofa‘aki mo e tokataha ‘oku nau taumu‘a ke kākaa‘i´.

Pē ko ‘ene feinga ke fakangalingali ʻoku fiema’u tokoni, pea nau fakalotoʻi leva ʻa e tokotaha kuo fakamaheni ki ai´ ke ʻoange ha paʻanga, pē koloa, pē fakahoko ha meʻa
ʻoku taʻefakalao.

3) Ngaahi ʻīmeili, text, telefoni, mo e ngaahi uepisaiti loi mo kākā

‘Oku fa‘a ngāue‘aki ‘e he ni’ihi feinga kākaa´ ni, ‘a e founga ko hono fakahā atu kuo ke ikunaʻi ha ngaahi meʻa (paʻanga, pale, mo e ngaahi alā meʻa pehē) pea fakahā leva
ke totongi ange ha paʻanga, pē ko hono ‘oange e fakaikiiki ho‘o ʻakauni pangikee´ kae toki maʻu mai e pale´.

ʻOku tapou atu e Potungāue Polisi Tonga´ ki he kakai ‘o e fonua´ ke tokanga lahi ange ki ha ngaahi ‘ofa pē foaki ‘oku fo‘ou mo hā ngali kehe ʻi he ʻinitaneti.

Kapau ‘oku ‘ikai ke ke fakapapau‘i ‘a e ngaahi fetu’utaki ‘initaneti pehee ni´, ‘oku lelei ange ke ke ‘uluaki kole tokoni mei ha taha, koe’uhi ke ‘oua ʻe mole noa ai ‘a ho’o paʻanga´ mo ho kakava kuo´ ke ngāue’i´ ki he ngaahi founga kākā mo loi ‘i he ‘initaneti´.