Hokohoko atu hono faka'ilo 'o Afemeimo'unga ki he lau'ikovi Featured
25 'Aokosi, 2021. Kuo fakahoko hano faka'ilo 'o Afemeimo'unga Hola 'e he loea 'iloa 'i he fonua ni ko William Clive Edwards ki he lau'ikovi'i.
'Oku makatu'unga 'a hono faka'ilo 'e Edwards 'a Afemeimo'unga mei he'ene polokalama live mai he facebook 'i he 'aho 19 'o 'Aokosi 2021 'o ha he'ene fakamatala 'oku kau 'a William Clive Edwards ka ko e loea 'a e Ta'ahine Pilinisesi Pilolevu 'i hono fetuku holo 'a e faito'o konatapu.
Fakatatau ki he fakamatala 'a Afemeimo'unga ko Samiu Vaipulu 'a ia koe loea 'a e 'Initia na'a ne faka'ilo 'a Afemeimo'unga ki he lau'ikovi'i 'o'ona pea mo Edwards 'a ia koe loea ia 'a Pilinisesi Pilolevu na'a ne fakahu atu 'a hono faka'ilo 'e he Pilinisesi 'a Afemeimo'unga 'oku na kau mo kinaua hono fetuku 'o e faito'o konatapu.
Na'a ne toe fehu'i foki kia Edwards he'ene polokalama live he facebook pe koe ha 'ene me'a na'e fai 'i 'Amelika.
Fakatatau ki he fakamatala 'oku ma'u mei he 'Ofisi Lao Edwards Law ko e faka'ilo sivile 'eni 'o 'eke pa'anga 'e $10,000 ki he maumau ki he ongoongo ka 'oku toe fakahoko mo e ngaue ke faka'ilo hia 'a Afemeimo'unga he kuo mahino mai 'a 'ene tukuaki'i noa'ia 'a e kakai 'o e fonua 'o kau ki ai mo e kau loea 'oku nau fakahoko honau fatongia mo e ngaue fakalao ke faka'ilo ia ki he tukuaki'i ta'emo'oni mo loi 'oku ne fakahoko he facebook.
'Oku to e mahino mei he fakamatala mei he 'Ofisi 'o e Edwards Law koe founga 'eni 'a e kau faihia ke ta'ofi 'a kinautolu 'oku ngaue atu ke fakatonutonu fakalao 'a e fa'ahinga hia ko'eni 'oku nau fakahoko.
'Oku taumu'a 'eni ko e kumi ongoongo, kumi pa'anga mo hono tukuaki'i noa'ia, loi mo 'ikai ha fakamo'oni 'o kinautolu 'oku ma'u tu'unga he fonua pea 'oku mahino 'oku 'i ai 'a e ni'ihi 'oku nau tekemui heni 'i he 'uhinga fakapolitikale.
'Oku fakamahino pe foki 'e Afemeimo'unga ia he'ene ngaahi fakamatala 'i he facebook 'oku 'ikai ha'ane fakamo'oni 'a'ana ia ki he'ene tukuaki'i tavale 'a e kakai ka ko e Pule'anga Fakatahataha (UN) tenau tokoni mai ke 'omai 'a e ngaahi fakamo'oni ki he'ene hopo.
'I he uike kuo maliu atu na'e toe tuku mai 'e Afemeimo'unga 'i he facebook 'ene tohi fakamanamana tene tamate'i 'a e matapule ko Mesui Vai ko 'ene lea ange ki hono 'ofefine 'i he facebook.
5 comments
-
Tau sio ki he faikehe hotau kakai, vakai pe ko e fakamatala ia e Afi 'ene 'otu mohe misi ka nau fakapa'anga ia 'enautolu.
-
Ko e ha e tau'i 'oku fai?. Ko e ta sign pe mo taa falani?. Ko e tau'i ko hono run 'a e rehabilitation program, polokalama ki he youth, awareness he ngaahi ako mo e youth 'a ia 'oku lolotonga fai 'e he kau counselors moe kau faifekau kuo nau ako kiai. Ko e kumi $$$ pe 'a e sesele ko'ena mo e fakatupu moveuveu.
-
Ko e me'alelei hono tau'i e faito'o konatapu ...ikai ke 'i ai ha taha 'e ta'e poupou ...ka ko e founga 'a e tangata ko eni mo e anga 'ene live 'oku ha mahino Mai ai 'oku male'ei e 'atamai ia pea oku osi taimi leva ke fakangata he tene fkhoko e maumaulahi ki he Fonua
-
Tau poupou ki hono tau'i e faito'o konatapu ka 'oku 'ikai koe kalasi ko'eni ke tukuaki'i noa'ia e kakai pea fakamanamana tamate he facebook pea 'ilonga ai 'oku ne kei ngaue'aki e drugs.
-
Kuo mahino lelei koe feinga pa'anga 'eni mo e fiehaa. 'Oku lolotonga tau'i pe e faito'okonatapu he ngaahi polokalama 'a e ngaahi siasi mo e pule'anga. Kole ki he leka ni koe tau'i mo'oni koe tuku 'ene ifi 'a e 'aisi.