Tautea ngāue pōpula polisi malōlō ki he fakamālohi ke ma'u ha pa'anga Featured
Na'e tautea 'i he Fakamaau'anga Polisi 'i Nuku'alofa 'a e 'ofisa polisi malōlō ko Uasila’a Halasima kene ngāue pōpula ki he ta'u 'e taha ka e toloi kakato 'i he ta'u 'e 2 pea kene ngāue ki he komiunitī 'i he houa 'e 40.
Ko hono toloi ko'eni 'o e tautea ngāue pōpula 'o Halasima ke 'oua tene toe fakahoko ha hia 'i he ta'u 'e ua 'oku toloi pe malu'i ai pea kapau tene fakahoko ha hia 'i loto he taimi koia tene ngāue pōpula leva he ta'u 'e taha.
Na'e tu'utu'uni foki 'a e Fakamaau Polisi Pule ke halaia 'a Halasima 'i he 'aho 14 'o Siulai pea na'e tu'utu'uni ai ke toki hilifaki hono tautea 'i he 'aho 21 'o Siulai.
Na'e faka'ilo foki 'a Halasima ki hono ma'u 'a e pa'anga 'e $200 mei he ongo matāpule Siaina 'i he hotele Tano'a 'i he 'aho 11 'o Sune 2017 'i he founga fakamalohi.
Na'e ngāue foki 'a Halasima koe 'ofisa kene tokoni ki hono fakamālohi'i 'a e lao ki hono ta'ofi 'o e ifi tapaka 'i he ngaahi potu faka-Pule'anga.
Ko e tokoua Siaina na'a na fakahoko 'a e lāunga na'a na ifi 'i he toumu'a 'o e hōtele Tano'a pea lolotonga 'ena ifi kuo hopo hifo 'a Halasima he tekisi 'o fakamālohi'i 'a e tokoua ko'eni ke 'oange 'a e pa'anga ko'eni 'e $200 telia na'a faka'ilo kinaua pea mavahe leva ia.
Na'e lipooti 'e he kau ngāue 'a e hōtele 'a e me'a ni ki he 'Apitanga Polisi Nuku'alofa pea na'e iku ke fakamalōlō'i ai 'a Halasima mei he ngāue pea faka'ilo foki ia ki he hia ko'eni.
