Tautea toloi mo mo'ua pa'anga pe 'a Lord Tu'ivakano Featured
24 'Epeleli, 2020. Kuo tu'utu'uni 'e he Tu'i Fakamaau Lahi Michael Hargreaves Whitten QC 'i he pongipongi 'o e 'aho ni ke tautea ngaue popula ta'u 2 kae toloi (suspend) 'i he ta'u 'e 2 mo mo'ua pa'anga pe 'a Lord Tu'ivakano ki hono fakamo'ua'i ia 'e he kau sula 'i he 'aho 9 'o Ma'asi 2020 ki he Fuakava Loi, Fakamatala Loi mo e ma'u moha mahafu 'ikai ha Laiseni.
Na'e toe tautea ai pe foki 'a Lord Tu'ivakano kene mo'ua taki pa'anga 'e $2000 ki he ma'u mo e me'a tau 'ikai laiseni pehe ki he mahafu 'ikai ma'u ha laiseni 'a ia ko e fakakatoa ko e pa'anga 'e $4000 'oku mo'ua ai 'a Tu'ivakano pea kene totongi 'i loto 'i he mahina 'e 3.
Na'e fakamo'ua'i foki 'e he kau sula mei Vaini mo Malapo 'a Lord Tu'ivakano ki he tikite 'e 3 'a ia koe fuakava loi, fakamatala loi mo e ma'u mo e mahafu 'ikai ha laiseni ka na'e tali halaia pe foki 'a Lord Tu'ivakano ia ki he ma'u mo e me'atau 'ikai ha laiseni.
'I hono fakaikiiki 'o e tautea ko'eni 'oku 'ikai ke ngaue popula 'a Lord Tu'ivakano ia ka 'oku toloi 'i he ta'u 'e 2 pea ke 'oua tene toe fakahoko ha hia 'e ala ngaue popula ai lolotonga 'a e ta'u 'e 2 'oku toloi ai.
'I he lolotonga 'a e ta'u 'e 2 koia 'oku ne fakahoko ai 'a e ngaue ki he Komiuniti (Community Service) 'i he houa 'e 100 pea koe ngaue koia fakatatau ki he fakamatala 'a e Fakafofongalao 'a Tu'ivakano William Clive Edwards ko e ngaue anga maheni pe ia 'oku ne lolotonga fakahoko ki hono kainga 'i he tokoni ki he fakalakalaka 'a e kainga hono ngaahi tofi'a pea 'oku anga pe 'a Tu'ivakano ia hono fakahoko e fa'ahinga ngaue ko'eni ma'a hono kakai.
'Oku toe fakamahino foki mei he Fakafofongalao 'a Tu'ivakano kuo 'osi fakahu ki he Fakamaau'anga Tangi 'a e tangi 'a Lord Tu'ivakano 'i he'ene ta'efiemalie fekau'aki mo e tu'utu'uni na'e fakahoko 'e he kau sula 'i he 'aho 9 'o Ma'asi 'a ia na'e makatu'unga ai 'a e tautea ko'eni.
'Oku mahino foki koe tautea ko'eni kuo hilifaki kia Lord Tu'ivakano 'oku 'ikai mole ai 'ene totonu ki hono hingoa tukufakaholo pehe ki hono tu'unga koe Fakafofonga Fale Alea 'o fakatatau mo e tu'utu'uni 'a e Kupu 23 'o e Konisitutone 'o Tonga.
Ko e hopo ko'eni na'e lele he mahina 'e 1 mo e ngaahi 'aho 'o toki 'osi ki he 'aho 9 'o Ma'asi pea koe tikite fakakatoa 'e 10 na'e faka'ilo kiai 'a Tu'ivakano pea na'e tamate'i 'a e tikite 'e 6 fekau'aki mo hono tukuaki'i ki hono fe'ave'aki 'a e pa'anga 'uli mo e tali ha totongi fakafufu (bribery) 'i he loto kiai 'a e Talatalaaki koe 'ikai ke 'i ai ha fakamo'oni.
'Oku 'amanaki foki ke fakahoko 'i he Fakamaau'anga Tangi 'a e tangi 'a Lord Tu'ivakano he mahina ko Sepitema pea fakatatau ki he fakamatala mei he Fakafofongalao 'a Tu'ivakano 'oku te'eki ke mahino pe 'e toe fai ha tangi fekau'aki mo e tautea ko'eni na'e hilifaki he 'aho ni.
