Fana’i Hono Matāpule Mo Hono ‘Ilamutu Ko e Mole ‘A e Hiapo ^Featured

Na’e leleaki’i mai foki ‘a e ongo kafo ki he Falemahaki Vaiola ‘i he efiafi Falaite. Ko e tokotaha he ongo kafo ko e matāpule mo'oni pe ‘o e tangata na’a ne fakahoko ‘a e fana ‘oku ta’u 50 (mali hono tuofefine) mo e ki’i talavou ‘oku ta’u 18 ‘a ia koe tamasi’i ia 'a e tuofefine pe 'e taha 'o e tokotaha na’a ne fakahoko 'a e fana 'a ia ko hono ‘ilamutu mo'oni pe moia.

Na’e lipooti foki ‘e he Matangitonga ‘a hono faka’eke’eke ‘o e Tokoni Komisiona Polisi Le’ole’o Tevita Fifita pea na’a ne fakahā ai koe fana ko’eni na’e fakahoko ki he tui to’omata’u ‘o e matapule ta’u 50 pea moe va’e mata’u ‘o e ki’i talavou ta’u 18. 'Oku 'i he tu'unga fakafiemalie pe 'a e ongo tangata kafo 'o 'ikai ke fakatupu 'e he lavea ko'eni ha mole ha mo'ui.

Na’e tupu ‘eni mei ha mole ha hiapo mei he ngoue’anga ‘a e faka’iloa pea ne tukuaki’i ai ‘a e tokoua ko’eni na’a ne fana’i. Na’e hanga ai ‘e he faka’iloa ‘o ‘uluaki fakamamahi’i hono ‘ilamutu ‘i hono ‘api kimu’a pea ne ‘ave ia ‘i ha kā ki ha ‘api ‘e taha pea mei ai ki he’ene ngoue’anga. Na’a ne toe ‘ave foki mo hono matāpule ki he ngoue’anga tatau ‘o hoko ai ‘a e fana fakalavea ko’eni.

Na’e puke ai pe ‘e he kau polisi ‘a e faka’iloa ‘i he pō Falaite fakataha moha tokotaha kehe ‘o faka’ilo mo ia ki he kaungā tauhi faka pōpula ta’e fakalao.

‘Oku toe ‘i ai mo e fakatotolo kehe ‘oku hoko atu ‘e he kau polisi ki he faka’iloa pea ‘oku mahino mai pe foki koe faka’iloa ‘oku ‘i ai pe ‘ene laiseni ke tauhi mo ma’u ‘a e me’afana 22 ko’eni.

‘Oku ki’i lahilahi foki ‘a e fakalavea ngaue’aki ‘a e me’atau ‘i he fonua ni pea na’e lipooti atu pe ‘ehe ongoongo ni ‘a e fana fakalavea na’e hoko ‘i Sopu ‘i he ngaahi uike kuo maliu atu.