Ko 'Ene 'Afio Tupou VI ^Featured

Ko e ‘alo fika tolu mo si’isi’i taha ‘eni ‘o e La’a kuo Ungafonua Kuonga hono fā Taufa’ahau Tupou IV pea mo Kuini Halaevalu Mata’aho ‘a ia ‘oku kei lakoifie lelei pe ‘o au mai ki he ‘aho ni ka koe Kuini Fehuhu ‘o Tonga.

Na’a ne maa’imoa ako ‘i he ‘apiako The Leys School ‘i Cambridge ‘i Pilitānia mei he ta’u 1973 ki he ta’u 1977 pea mei ai leva na’e hoko atu ‘a e maa’imoa ‘a e Tama ki he ‘Univēsiti East Anglia ‘o hoko atu ai ‘i he mala’e ‘o e Ako ki he Fakalakalaka (Development Studies) mei he ta’u 1977 ki he ta’u 1980.

Na’e liuaki ‘a e Tama ki he ‘Otu Felenitē pea na’e kamata fakahoko fatongia ‘i he Va’a Tau Tahi ‘a e Tau Malu’i Fonua ‘a Tonga ‘i he ta’u 1982 ‘o a’u ai ki he tu’unga koe Lafitani Komanitā (Lieutenant Commander) ‘i he ta’u 1987. Na’e hoko atu ‘a e mama’imoa ki he ‘Apiako Tau tahi ‘a ‘Amelika (US Naval War College) lolotonga ‘Ene ‘i he fatongia ‘a ia koe kalasi ia hono 33 ‘i he ta’u 1988.

Mei he ta’u 1990 ki he ta’u 1995 na’e hoko ‘a e Tama koe Kapiteni ‘o e Vaka Le’o ‘a e Va’a Tautahi ‘a e Tau Malu’i Fonua ‘a Tonga koe VOEA (Vaka ‘O ‘Ene ‘Afio) Pangai ‘o kau atu kiai mo 'Ene hoko ko e 'Eikivaka 'o e VOEA Pangai 'i he fatongia ‘o e Tau Malu'i Fonua 'a Tonga ki he Tau Fakamelino ‘i Bougainville ‘i Pāpua Niukini ‘i he ta’u 1992.

Na’e fakahoko foki ‘a e Tama ki he faka'ilonga fakaako ko e MA (Masters) ‘i he ako ki he Malu’i (Defence Studies) mei he ‘Univēsiti ‘o Niusauele (University of New South Wales) ‘i he ta’u 1997 pea mo e faka'ilonga MA ‘i he Vā Fakavaha’a Pule’anga (International Relations) mei he Univēsiti ‘o Bond ‘i ‘Aositelelia ‘i he ta’u 1999.

Na’e fokotu’u ‘a e Tama ki he Lakanga koe Minisitā Malu’i mo e Minisitā ki Muli ‘i he ta’u 1998 pea fokotu’u ia ki he Lakanga ko e ‘Eiki Palēmia ‘o e fonua ‘i he ‘aho 3 ‘o Sanuali ta’u 2000. Na’e tatau ‘a e Tama ki he Lakanga Palēmia ‘i he ta’u 2006.

Na’e toe fokotu’u pē ‘e he Pule’anga ‘o ‘Ene ‘Afio ‘i he ‘aho koia ‘a e Tama kene hoko koe fuofua mo e ‘uluaki Hai Komisiona ‘a Tonga ki ‘Aositelēlia ‘i he ta’u 2008 ‘o ngata mei he’ene hoko ki he Taloni ‘i he ta’u 2012 hili ‘a e Hala ‘a e La’a Hono V Kingi Siaosi Tupou V.

Na’e fālute ‘e he Tama ‘a e Hingoa Nōpele Tukufakaholo ‘e 3 ‘a ia koe Lavaka, Ata mo e ‘Ulukalala kimu’a ‘i he’ene hoko ki he Taloni ‘o Tonga. Na’e ta’ane ‘a e Tama mo Nanasi Pau’u Vaea (Kuini Nanasipau’u) pea ‘i ai hona ‘alo ‘e 3 ‘a ia koe Ta’ahine Pilinisesi Lātūfuipeka Tuku’aho, Tama Pilinisi Kalauni Tupou To’a ‘Uluakalala, pea mo Pilinisi Ata.

‘Oku longolongo Kātoanga ‘a e ‘Otu Anga’ofa ‘i he ngaahi ‘aho ni ‘i he ‘amanaki ke Hilifaki Kalauni ‘a e Tama ka koe Hau Toka ‘o e ‘Otu Tonga pea ‘oku tu’unga ai hono ‘oatu ‘a e ki’i piokalafi nounou ko’eni ‘o e Tama Tu’i neongo ‘oku 'ilo 'e he a'u 'a e fihi ‘a e maile pea ‘oku ‘ikai malava ke ‘a’aua ‘a e ngeia mo e langilangi pehē ki he ngaahi maa’imoa ola ‘i he tapa kehekehe ‘o e mo’ui.

‘Oku ‘oatu fakataha pe ia moe Talamonū ‘a e ki’i Kolomu ni ki he Tama Tu’i Tupou VI ki hono teu Hilifaki Kalauni mo e Hūfaki pea ke kei Tonga pe 'a Tonga 'o tuputupu'a.