Fokotu’u ki ha Pāloti ke Fakamālōlō’i ‘a e Palēmiá ^Featured

Ko e Fakamatala Fakata’u ‘e taha mo e Lao Fakaangaanga fakakātoa ‘e fitu ne fakapaasi ‘i he fakataha ‘o e ‘ahó ni, hili ia ‘a e ngāue ‘a e ngaahi Komiti Tu’uma’u ‘a e Fale Aleá ki he ngaahi laó ni. Kuo toloi ai ‘a e Fale Aleá ke toki fakataha ‘i he ‘aho 12 ‘o Sanuali 2021.

Kuo tufa atu ‘i he ‘ahó ni ki he Hou’eiki Memipa ‘o e Fale Alea ‘o Tongá ‘a e Fokotu’u Fika 2/2020: Fokotu’u ki ha Paloti ke Fakamālōloo’i ‘a e Palēmiá.

Na’e fakahū mai ‘a e Fokotuú ni ki he ‘Ofisi ‘o e ‘Eiki Sea ‘o e Fale Aleá, Lord Fakafanua, ‘i he ‘aho Pulelulu 9 ‘o Tisema 2020 ‘e he Fakafofonga ‘o e Kakai ‘o Tongatapu 2, Hon. Semisi Sika, peá ne fakamo’oni hingoa ki ai ha Hou’eiki Mēmipa ‘o e Fale Aleá fakakātoa ‘e toko hongofulu.

Hange ko ia ‘oku hā ‘i he Kupu 50B(2) ‘o e Lao ‘o e Konisitūtone ‘o Tongá, ‘oku ‘atā ke fakahū mai ha fokotu’u ke fakahoko ha Pāloti ke Fakamālōloo’i ‘a e Palēmia, ka kuo pau ke toki lava ia ‘o fakahū mai ‘i he hili ha māhina ‘e 18 mei he fili lahí.

Na’e fakahoko ‘a e fili lahi fakamuimuí ‘i Nōvema ‘o e ta’u 2017, ‘a ia kuo ‘osi kakato ‘a e māhina ‘e 18 hili ‘a e fili lahí pea ‘oku ‘atā ai ke fakahū mai ‘a e fokotu’ú ni.

Hili hono ma’u ‘e he ‘Eiki Seá ha fokotu’u peheni, ‘oku ‘i ai ‘a e taimi pau ‘oku tu’utu’uni ‘e he Kupu 50B(2)(a) ‘o e Konisitūtone ‘o Tongá, pea mo e Tohi Tu’utu’uní fekau’aki mo e taimi ‘e ngofua ke tēpile’i ai ‘i ha fakataha ‘a e Fale Aleá.

He’ikai lava ke ‘asenita ki ha fakataha ‘a e Fale Aleá kae’oua kuo kakato ha ‘aho ngāue ‘e 5 mei hono ma’u ‘e he ‘Eiki Seá, ka ‘e ‘ikai toe lahi hake he ‘aho ngāue ‘e 14 hili hono ma’ú.

Ko e “‘aho ngāue”, ‘oku faka’uhinga’i ia ‘e he ‘Eiki Seá (‘o ngāue’aki hono mafai ‘i he Tu’utu’uni 1(2) ‘o e Tohi Tu’utu’uní) ke ‘ikai lau ki ai ‘a e ‘aho mālōlō faka-Pule’anga (public holidays), ngaahi ‘aho mālōlō ‘a e Pule’anga ‘i he faka’osinga ‘o e ta’ú (21 Tisema 2020 ki he 1 Sanuali 2021), mo e ngaahi ‘aho faka’osinga ‘o e uiké. 

‘I he’ene peheé, ko e ‘aho fakaangaanga ‘oku tu’utu’uni ‘e he ‘Eiki Seá ke ‘asenita ai ‘a e Fokotu’ú ni ki he Fale Aleá, ‘i he fakataha hoko ‘a e Fale Alea ‘a ia ‘e fakahoko ‘i he ‘aho Tūsite 12 ‘o Sanuali 2021.

Kuo tuku atu ai pē ‘i he ‘ahó ni ‘e he ‘Eiki Seá ‘a e Fokotu’ú ni ki he Kōmiti Tu’uma’u ki he Ngaahi Totonu ‘a e Fale Aleá, kenau fakahoko honau fatongia angamaheni ki he ngaahi fokotu’u pehení ‘o fakatatau ki he Tohi Tu’utu’uni ‘o e fakataha ‘a e Fale Aleá.

Na’e ‘oatu ai pē ‘i he ‘ahó ni ‘e he ‘Eiki Seá ha faingamālie ki he ‘Eiki Palemiá, Hon. Pohiva Tu’i’onetoa, ke ‘omai ha’ane tali ki he Fokotu’ú ni. Kapau ‘e fie faka’aonga’i ‘e he ‘Eiki Palēmiá ‘a e faingamālié ni, ‘e tuku atu pē mo e tali ko iá ki he Komiti Tu’uma’u ki he Ngaahi Totonu ‘a e Fale Aleá kenau vakai’i pea toki lipooti fakataha ki Fale Alea mo e Fokotu’ú.