Fakafolau ongo pekia Kolisi Mailefihi Siu’ilikutapu ki Tonga he Tokonaki Featured
Ongo pekia ko Sione Taumalolo mo Talita Fifita
29 Tisema, 2016. Kuo fakaha ‘e he Palesiteni ‘a e Kolisi Tutuku Kolisi Mailefihi Siu’ilikutapu ‘a Nu’usila Faifekau Mele Suipi Latu ‘e fakafolau ‘a e ongo pekia ki Tonga ‘i he ‘aho Tokonaki 31 ‘o Tisema.
Ko e ongo peki foki ko Sione Taumalolo ta’u 11 mo Talita Fifita ta’u 33 ‘a ia na’e fakahoko ‘a e ngaue faka’osi ki he sino ‘o e ongo pekia ‘i Rotorua kimu’a pea fakafolau ki ‘Aokalani ‘i he ‘aho ni.
‘Oku mahino mai foki kuo tu’uta mo e toenga ‘o e kau folau ki ‘Aokalani pea na’e fu’u faitokonia foki kinautolu ‘e he ngaahi kautaha tokoni ‘o kau kiai ‘a e tokoni ‘a e ‘Ea Nu’usila ki hono fakafolau kinautolu ki ‘Aokalani.
‘Oku ‘i ai foki moe fokotu’utu’u ke ‘ave a e sino ‘o e ongo pekia ki he Falelotu Vaine Mo’onia ‘i Ponsonby ke fakahoko kiai ‘a e failotu mo e ngaahi famili, ngaahi siasi pehe ki he ngaahi kaungame’a.
Ko e fakatu’utamaki fakaloloma ‘eni kuo hoko pea kuo mahino mai pe foki ‘e foki mai ai pe ‘a e folau feinga pa’anga ko’eni ki Tonga ni hange koe faka’amu ‘a e ‘Eiki Tokoni Palemia ‘i he’ene ‘a’ahi kiate kinautolu na’e hoko kiai ‘a e fakatu’utamaki.
Kuo ma’u foki mo e fakaha mei he Falemahaki Vaiola ‘oku teuteu ‘a e falemate ke fakaha’ele mai kiai ‘a e ongo pekia.
