Fanongonongo Faka-Pule'anga - Hala Kuini Fehuhu Halaevalu Mata'aho Featured
27 Fepueli. 2017. Kuo tu’utu’uni ‘a e Kapineti ‘a ‘Ene ‘Afió 'e fakahko 'a e Faka’apa’apa Fakapule’anga ki he pulonga kuo tō ‘i he ‘Otu Felenité, ‘i he Hala ‘a ‘Ene ‘Afió, Kuini Halaevalu Mata’aho, ko e Kuini Fehuhu ‘Ofeina ‘o e ‘Otu Tongá.
Kuo tu'utu'uni ai 'e he Kapineti ‘a ‘Ene ‘Afió ke Toumoloto ‘a e Fuka Tonga ke fakahā ‘a e faka’apa’apa ki he hala ‘a ‘Ene ‘Afió, Kuini Halaevalu Mata’aho ko e Kuini Fehuhu ‘Ofeina ‘o e ‘Otu Tongá.Kuopau pe ke toumoloto ‘a e fuka kotoa ‘i he ‘Otu Tonga ni ‘o kamata mei he ‘aho Tusite 28 ‘o Fepueli 2017.
Ko e ‘aho eni ‘e tu’uta mai ai ‘a ‘Ene ‘Afió, Kuini Halaevalu Mata’aho ko e Kuini Fehuhu ‘Ofeina ‘o e ‘Otu Tongá kuo halá, ki Tonga ni. ‘E hokohoko atu pē ‘a e toumoloto ‘a e fuka Tongá he vaha’a taimi ‘o e Tapu pō hongofulu ‘a e Fale ‘o Ha’a Moheofó.
Kuo toe tu'utu'uni ai 'e he Kapineti ‘a ‘Ene ‘Afió 'i he faka’apa’apa ki he ouau Telio ‘o ‘Ene ‘Afió, Kuini Halaevalu Mata’aho ko e Kuini Fehuhu ‘Ofeina ‘o Tonga kuo halá ke hoko ‘a e ‘aho Pulelulu 1 ‘o Ma’asi 2017, ko e ‘Aho Malōlō Faka-Pule’anga Makehe ki he kotoa ‘o e ‘Otu Tonga ni.
-'Ofisi 'o e Palemia
