Fiema’u ha Palēmia ‘oku mou’i lelei, fakakaukau lelei pea kei ma’u ivi ^Featured

‘Oku ‘i ai ‘a e faka’apa’apa lahi ki he Palēmia ka koe tu’unga ni foki koe sevaniti ma’a e kakai pea ‘oku ‘i ai ‘a e totonu ‘a e fonua kenau ‘ilo ki he tu’unga mo’ui lelei honau Palēmia pea ko e totonu faka-temokalati ia ‘ikai ngata ai ka ‘oku fakalele ‘a e fonua ‘aki ‘a e tukuhau ‘a e kakai.

‘Oku ‘ikai koha me’a fo’ou ia ‘i mamani ‘o a’u mai pe ki Tonga ni ‘a e fakafisi ‘a e kau Palēmia ‘i he ‘uhinga ko e ‘ikai kenau mo’ui lelei pea koe founga totonu ia ke fakahoko he ‘oku fiema’u ha ‘eikivaka ‘oku mo’ui lelei, fakaukau lelei pea kei ma’u ivi ke tataki ‘a e fonua.

Ko e siokita mo’oni pe ‘ia kapau ‘oku ‘ilo pe ‘e he famili, kulupu faka-politikale, mo e kau muimui ‘oku ‘i he tu’unga fakatu’utamaki ‘a e taki kanau kei teke pe koe ‘uhi koe ‘ikai fie mavahe mei he mafai pehe ki he ngaahi ‘asenita faka-politikale ‘oku nau taumu’a kiai.

‘I he tafa’aki ‘e taha ‘e malava pe ia ke faka’uhinga ko hono tuku pe ‘a e Palēmia ia ke fakalangilangi ‘i he ‘ilo’ilopau ‘oku ‘ikai ke mo’ui lelei, ‘ikai ke peseti ‘e 100 ‘ene tu’unga faka-fakakaukau pea ‘ikai hano ivi kae kei tuku pe ‘i he lakanga kae faingofua ‘a e fa’iteliha ‘a ‘ene Kapineti pehe ki he kau muimui ‘i he fonua.

‘Oku fehu’ia leva ‘i he taimi tatau ‘a e tu’unga ‘o e famili ‘o e Palēmia tautautefito ki he’ene fanau pea mo e anga ‘enau faitu’utu’uni he koe ivi lahi taha ‘oku ‘iate kinautolu ke fakahoko ha tu’utu’uni fakapotopoto tautau tefito ki he tu’unga faka-mo’ui lelei ‘oku ‘i ai ‘a e Palēmia ka ko’enau tamai foki.

'Oku fehangahangai ia mo e laumalie ‘o e temokalati ke ‘i ai ha taki ‘oku ‘ikai mo’ui lelei, holo mo ‘ene tu’unga faka-fakaukau pea ‘ikai si’ano ivi ke fakahoko ‘aki ‘a e fatongia ko hono tataki ‘o e fonua.

Kuo ‘osi kakato ‘a e fakamo’oni ia ki heni ‘o hange koia na’e ‘ilo kiai ‘a e kakai ‘o e fonua ‘i hono fakafuakava’i ‘o e Palēmia mo ‘ene Kapineti ‘i he fakataha ‘a e Fale Alea ‘i he ‘aho Tu’apulelulu 18 ‘o Sanuali he na’e ‘omai hangatonu pe ‘a e Palemia mei he Falemahaki Vaiola pea na’e fakafe’ao mai ai ‘a e kau Toketā pea toe me’a pe ‘oku te’eki tuku ‘a e fakataha ‘a e Fale.

‘Oku toe ma’u pe foki mo e fakamatala falala’anga ‘o a’u pe ki hono tukumai ‘e he ngaahi kautaha ongoongo ‘oku kanisā ‘a e Palēmia neongo ‘oku te’eki ke ‘omai ha tali mahino mei he Pule’anga ke fakapapau'i 'eni.

‘I he ta’u 2013 na’e toutou fokotu’u ‘e he Palēmia ‘o e ‘aho ni ‘Akilisi Pohiva ki he Fale Alea ‘o Tonga ke fai mo fakahoko ha ngāue ki he Fakfofonga Fale Alea ‘o Ha’apai 13 ‘Uliti Uata ‘i he ‘uhinga na’e ‘ikai ke mo’ui lelei fakaesino kae kei Fakafofonga Fale Alea pe pea na'a ne fiema’u ke fakafofonga’i lelei ‘a e kakai ‘o e Vahenga Fili ko 'eni he ‘oku mole ‘a e pa’anga tukuhau ‘a e kakai.

Ko e ngaahi ta’u ki mu’a atu lolotonga hono kei fili ‘e he Tu’i ‘o e ‘aho koia Taufa’ahau Tupou IV ‘a e Palēmia ‘o e fonua, na’e fakafisi ‘a Pilinisi Fatafehi Tu’ipelehake mei he lakanga Palēmia ‘i he ‘uhinga koe ‘ikai ke laumalie lelei (mou’i lelei).

Ko e me’a tatau na’e hoko kia ‘Eiki Nōpele Vaea ‘a ia na’a ne kole ke fakafisi mei he lakanga Palēmia ‘i he ‘uhinga tatau.

Ko e ‘aho ni ‘oku lahi ‘a e laaulea ‘i he tu’unga mo’ui lelei ‘oku ‘i ai ‘a e Palēmia pea ‘oku ‘ikai tokoni ‘a e Pule’anga ‘i hono ‘omai ‘a e mo’oni ki he kakai ‘o e fonua pea ‘oku kehekehe ‘a e ma’u ‘a e kakai ‘o a’u pe ki he ngaahi mītia ‘i muli.

Ko e kaveinga matu’aki mahu’inga ‘eni pea ‘oku totonu ke ‘oua ‘e to’o hala’i ‘eni koha tukuhifo 'o e Palēmia ka ‘oku mahu’inga ke fakapotopoto ‘a e tu’unga hono fakalele ‘o e fonua pea ‘oua e hoko ‘eni koha me’a tene tukuhifo ‘a e ngeia ‘o Tonga koha fonua tau’atāina pea fakalele faka-temokalati 'i he'ene 'ata atu ki tu'apule'anga..

Ko e fa’unga ‘o e ‘aho ni mo e temokalati ‘oku tu’uaki ‘oku fiema’u ‘a e taliui (accountability), ‘ata ki tu’a (transparency) pea koe me’a ‘oku hoko ki he tu’unga mo’ui lelei ‘a e Palēmia neongo ‘oku ‘ikai ko si'ano loto ka ‘oku ‘i ai ‘a e totonu ‘a e kakai totongi tukuhau kenau ‘ilo kiai pehe ki hano tukuatu ‘enau fakakaukau fekau’aki mo e kaveinga mahu’inga ni.

Ko e tu'unga 'oku 'i ai 'a e mo'ui 'a e Palēmia 'i he 'aho ni 'oku mahino 'aupito 'oku 'ikai ke lelei pea 'i he'ene 'ikai lelei 'oku pau pea mahino 'oku uesia ai 'ene fakakaukau tukukehe ange 'a e holo hono ivi ngaue.