A’u ki he Tu’i ta'efiemalie fekau’aki mo e Komisoni Fakamafolalea ‘a Tonga Featured
Paul Thomson, Palesiteni 'o e Kautaha Fakamamani Lahi 'a e Ngaahi Mitia Papulika (Public Media Alliance)
9 Mē, 2017. Kuo fakahoko atu ‘e he Kautaha Fakamamani Lahi 'a e Ngaahi Mitia Papulika (Public Media Alliance) ‘enau tohi ki He’ene ‘Afio Tupou VI fekau’aki mo ‘enau hoha’a ki he ngaahi feliuliuaki ‘i he Komisoni Fakamafolalea ‘a Tonga.
‘Oku makatu’unga foki ‘a e tohi ko’eni ‘i he ngaahi tu’utu’uni ‘a e Palēmia mo e Potungāue Ki he Ngaahi Pisinisi ‘a e Pule’anga ‘oku fakaaoao ki he Komisoni pea iku ki hono fakahalaki ‘a e ngaahi tu’utu’uni ko’eni mei he Fakamaau’anga.
‘Oku kau ki heni ‘a e ngaahi ta’efiemalie ‘a e Palēmia tokua ‘oku ‘ikai poupou ange ‘a e Komisoni mo ‘ene kau ngāue ki hono Pule’anga pea mo e tu’utu’unu ke fakafisi ‘a e Sea ‘o e Poate pea ‘ikai tali ke fakaloloa ‘a e konituleki ‘a e Pule ‘o e Komisoni.
‘Oku ‘i ai mo e ngaahi kaveinga kehe ‘a ia ‘oku hoko ai ‘a e Komisoni ko e tāketi nai ki he ngaahi tukuaki’i ‘a e Palēmia mo hono Pule’anga.
‘I hono lipooti ‘e he ongoongo ‘a e Letiō Nu’usila ‘a hono faka’eke’eke ‘o e Palesiteni ‘o e Kautaha Fakamamani Lahi 'a e Ngaahi Mitia Papulika (Public Media Alliance) Paul Thomson na’a ne pehē ai koe fatongia ‘o ha Komisoni Fakamafolalea ko hono malu’i ‘a e totonu mo e fiema’u ‘a e kakai ‘o e fonua pea kenau tau’atāina mei hano pule’i ‘e he Pule’anga.
Na’a ne fakamatala ai ko hono tāketi’i ‘e he Palēmia mo e Pule’anga ‘a e Komisoni mo ‘ene kau ngāue ‘oku ‘ikai totonu ia pea ko hono tapalasia ia 'a e totonu 'a e ongoongo ke tau'atāina.
Na’a ne toe kole foki ‘i he malumalu hono fatongia koe Palesiteni ‘o e Public Media Alliance ki he kakai mo e ngaahi kupu fekau’aki kau ai ‘a e Palēmia mo e Pule’anga ke fakaa’apa’apa’i ‘a e tau’atāina ‘a e fakamafolalea.
Na’e ‘osi fakahoko foki ‘a e tohi ‘a e Kautaha Fakamamani Lahi 'a e Ngaahi Mitia (Public Media Alliance) ki he Palēmia ‘o fakahoko kiai 'enau ta’efiemalie.
