"Toutou lau’i kovi’i pe kita kae kole pe": Kole Kele’a kia Clive Edwards Featured
6 Me, 2017. Na’e kei tali lelei pe ‘e William Clive Edwards ‘a e kole ‘a e Nusipepa Kele’a he ‘aho Falaite ‘o e uike ni ke tukuange ha taimi fe’unga ke totongi ai honau mo’ua kiate ia.
Ko e mo’ua foki ‘eni ‘o e Nusipepa Kele’a kia Edwards ki he taha ‘o ‘enau ngaahi tukuaki’i mo laui’i kovi’i ta’e mo’oni ‘o William Clive Edwards.
Ko hono lau’i kovii foki ‘eni ‘e he Nusipepa Kele’a ‘a Edwards ‘i he ta’u 2010 ‘o tukuaki’i tokua ‘oku ‘i ai ‘ene paati pea ‘oku nau fa’ufa’u fakafūfū ke fakafepaki’i ‘a e temokalati.
Na’e iku ke tu’utu’uni ai ‘e he Fakamaau’anga ‘oku ‘ikai mo’oni ‘eni pea tu’utu’uni ai kenau totongi ‘a e pa’anga ‘e laumano kia Edwards ‘i he ta’u 2012.
‘I hano faka’eke’eke ‘e he ongoongo ni ‘a Edwards na’a ne fakahā koe talu ‘eni ‘o e mo’ua mei he fakatonutonu koia pea na’a ne tali pe ke totongi fakakongokonga ka ‘oku te’eki ke ‘osi ‘a e mo’ua ko’eni.
Na’e toe fakahā foki ‘e Edwards mo’ene malimali ‘oku ‘ikai kene kei manatu’i he ‘oku lahi ‘a e mo’ua ‘o e Nusipepa Kele’a kiate ia pea ‘oku laumano ka koe taha ‘eni ‘o e ngaahi mo’ua.
Na’a ne toe fakamatala foki koe fatongia totonu pe ‘eni ia ‘o e Fakamaau’anga ke fakapapau’i ‘oku muimui ‘a kinautolu ‘oku mo’ua ki he lao pea ke totongi foki honau ngaahi mo’ua.
Na’e tu’utu’uni ‘e he Fakamaau’anga ki he va’a Bailiff ‘a e Potungāue Fakamaau’anga ‘i he uike ni ke fakamalohi’i hono ‘eke ‘a e mo’ua ko’eni he kuo fu’u fuoloa pea na’e ‘amanaki ke ala atu ‘a e va’a Bailiff ke puke ‘a e ngaahi koloa ‘a e Kele’a he uike ni.
Na’e makatu’unga mei heni ‘a e kole ‘a e Nusipepa Kele’a kia William Clive Edwards ke tukuange hanau faingamalie ke totongi ‘osi honau mo’ua ‘i he Falaite ‘o e uike ki tu’a pea na’e tali ‘a e kole ko’eni ‘e Edwards.
“’Oku fakaoli masi’i ‘a e fakahinga founga ia ko’eni ke toutou lau’i kovi’i pe kita mo tukuaki’i loi ‘o a’u ki he ‘aho ni ka nau kei malava pe ke omai ‘o kole, kapau koau ia he’ikai teu lava ia e au” ko Clive Edwards ia mo ene kata.
![](http://pinterest.com/pin/create/button/?url=https://nepituno.to/~nepituno/index.php/opinions/item/2093-toutou-lau-i-kovi-i-pe-kita-kae-kole-pe-kole-kele-a-kia-clive-edwards&media=https://nepituno.to/~nepituno/media/k2/items/cache/f126d80ce9754cf143e221ec8c4677bc_XL.jpg&description="Toutou lau’i kovi’i pe kita kae kole pe": Kole Kele’a kia Clive Edwards "Pin It")
3 comments
-
Fielau he ko Clive koe poto 'oku longo pe mo tanaki pa'anga ka e fai e loi moe longoa'a o iku ai pe ki he kole fakamolemole. 'Ofa 'e ako aa 'e he Kele'a ha me'a pea kumi moha 'etita na'e ako ka 'oku 'ikai koe mata'i fakafifisi pe he ko hono ola koe mo'ua ma'u pe..
-
'Oku fakaofo kiate au 'a e me'a ni he 'oku 'ikai ke meimei hala ha taimi hono tala 'e he Kele'a mo hono kau poupou 'oku kau 'a Clive he kau mafia. Ha 'oku toe kole ai?..........
-
Malie tama ee pea 'oku ngali pe ia mo koe Clive he koe tangata mahino pea 'oua 'e fetongi'aki e kovi 'a e kovi kae fai pe fakataha oe katakai telia na'a ako ai ha kakai.