Taki Palēmiá he kau folau ki he Fakataha hono 70 ‘a e Pule’anga Fakatahatahá ‘i Niu’ioake Featured
Nuku'alofa, 22 Sepitema 2015. ‘E me’a ‘a e Palēmia ‘o Tongá, Hon. Samuela ‘Akilisi Pohiva, ‘o fakahoko ‘a e lea ‘a Tonga ki he Fakataha hono 70 ‘a e Kautaha ‘a e Pule’anga Fakatahatahá (UNGA) ‘e fakahoko ki he ‘ulu’i ‘ofisi ‘o e Pule’anga Fakatahatahá ‘i Niu’ioake, ‘Amelika mei he ‘aho 15 Sepitema- 4 ‘Okatopa 2015.
‘E kau atu ‘a e Palēmiá, ‘a ia ‘oku ne taki he kau fakafofonga ‘o Tonga ki he fakataha, ki he fakataha ki he Polokalama ki he ngaahi Taumu’a Ola lalahi ‘o e mo’ui fakapotopoto 2015 (Sustainable Development 2015) mei he 25-27 Sepitema pea te ne fakahoko mo e lipooti ‘a Tonga ki he ‘Asenita Fakalakalaka (Summit of Adoption of the Post 2015 Development Agenda) ‘e fakahoko he ‘aho 26 ‘o Sepitema 2015. ‘E kau atu ‘a e Palēmiá ki he ngaahi fakataha kehekehe lolotonga ‘a e Fakataha Lahi ‘a e Kautaha ‘a e Pule’anga Fakatahatahá.
‘E toki fakahoko ‘e he Palēmiá ‘a e lea ma’a Tonga ki he Fakataha’anga ‘a e Pule’anga Fakatahatahá ‘i he ‘aho 29 Sepitema 2015. ‘Oku muimui folau he Palēmiá, ‘a e Minisitā Mo’uí mo e Sea ki he Komiti Ngāue ‘a e Falealeá ki he Tupu Tokolahi mo e Fakalakalaká, Hon. Dr. Saia Ma’u Piukala; Fakafofonga Falealea ‘o e Kakai ma’a Tongatapu 2 mo e Sea ‘o e Komiti Kakato ‘a e Falealeá, Semisi Sika; Sekelitali Pule mo Sekelitali ki he Kapinetí, Dr. Palenitina Langa’oi; Sekelitali ‘o e Potungāue ki Muli mo Fefakatau’akí, Va’inga Tōnē; toko tolu mei he Fakafofonga ‘o Tonga ki he Pule’anga Fakatahatahá; ‘Ofisiale ‘e toko tolu mei he Potungāue Mo’ui pe fekau’aki mo e Potungaue tatau.
Ko e toenga ‘o e kau fakafofongá ‘oku kau ki ai ‘a e ‘ofisa fale’i fakatekinikale ‘e toko ua mei he ‘Ofisi ki he Polokalama Fakalakalaka ‘a e Pule’anga Fakatahatahá (UNDP) ‘i Tonga ni/ pea mo ha fakafofonga ‘o e Sosaieti Sivilé ‘i Tonga/ mei he Kautaha ‘a e kau Ngāue Fakapule’angá.
3 comments
-
Ko e fo'i folau eni na'e totongi ai 'e he Pule'anga mo Mele 'Amanaki mo me'a na'e oo 'o fe'unga mo e uike 'e 3 ki 'Amelika 'i he fakataha ko'eni. Ko fe leva e 'ofa fonua mo e tu'utu'u 'o e fakamole.
-
Ko e pule'anga kuo hili na'e 4 kilu e fakamole he folau ka ko e pule'anga fakapotopoto 'o 'Akilisi Pohiva 'e a'u ia ki he 9 kilu. Ko e vahe 'a Piveni $500 ki he 'aho. 'Oku toe kau nai 'a Po'oi he folau ko eni ? Kapau 'oku 'ikai, ko hai 'oku ne fai e me'a na'e 'uhinga ai hono fakangaue'i ? Kapau 'oku 'io, 'oku fiha 'ene per diem ki he 'aho ? 'Oku totongi 'e 'Akilisi pe ko e pule'anga (kakai) ?
Ko e taha foki ko e fa'a folau fakafaito'o 'a e palemia, ko hai 'oku ne totongi ? Kapau ko e pule'anga pea 'oku totonu ke fakamatala mai ki he kakai ke nau 'ilo pe ko e ha hono mahaki 'oku fa'a folau fakafaito'o ai he ko e pa'anga 'a e kakai 'oku fa'a 'ave 'aki e folau ko ia na'a ne fa'a fakaanga'i. -
Na'e me'a 'a e PM 'i Fale Alea 'oku ne give up ene folau e fiha pea e fakahoko pe folau e fiha. Pea kuo hanga kuo ta'efa'alaua e folau ia. Ko e to ee a e loi ke a'u pe o fai hifo mei he tumutumu ke tufi ai e hakotupu mo e kakai mateaki fonua ...