“Fakataha Palēmia ‘o Tonga mo Fisi.” ^Featured

 Na’e fakahoko ‘a e fakataha ‘a e ongo Palēmia ni ‘i he Yatule Resort ‘i Sigatoka ‘i he ‘aho Tusite 5 ‘o Me.
 
“ Na’a ku fiefia lahi ‘i he fakataha na’e fakahoko he na’e lava ke ma vahevahe ‘a e ngaahi kaveinga mahu’inga ‘oku kaunga tonu ki Tonga mo Fisi,” ko e me’a ia ‘a e ‘Eiki Palēmia.
 
“ Na’e lahi e ngaahi kaveinga na’e fai ki ai e tokanga kau ai ‘a e ngaahi fokotu’utu’u ki he ngaahi kautaha fakafeitu’u mo e Fakataha’anga ki he fakalakalaka ‘a e tukuifonua Pasifiki(PIDF); kautaha Vakapuna Fiji Airways mo ha ngaahi faingamalie fepuna’aki ki Vava’u; Hakau Tele ki Tonga mo Tele ki Tokelau; ‘o kau ai mo e ngaahi ngaue fakamataki ‘a e Ngaahi Fonua lalahi mo ma’umafai ‘i he Pasifiki.”
 
“ Na’a ma vahevahe ai mo e ngaahi kaveinga kau ki he fa’unga ‘o e liliu fakapolitikale mo fakasosiale, mo fe’inasi’aki he ngaahi fakakaukau ki he ngaahi kaveinga lahi.”
 
Na’e me’a ‘a e ‘Eiki Palēmia, Hon ‘Akilisi Pohiva na’e lava ke ne fakahā tonu ki he Palemia ‘o Fisi ‘a e tu’unga ‘o Tonga ‘i he PIDF mo e Fakataha’anga Fakapalēmia ‘a e Pasifiki(PIF) ‘i he’ena vahevahe he kaveinga ki he PIDF.
 
‘Oku te’eki ke foki ‘a Fisi ki he PIF neongo ‘a e fakaafe mei he PIF ke nau toe foki ‘o memipa hili hono tuku fakataimi kinautolu kitu’a talu mei he liukava fakakautau he ta’u 2006. Kuo tukuatu ‘a e faingamalie ko ia ki Fisi talu mei he ‘osi ‘enau fili fakatemokalati na’e fakahoko ‘i Sepitema 2014.
 
Na’e fakahā ‘e Bainimarama ‘a e loto hono fonua ke toe foki ‘o memipa ‘i he Fakataha’anga Fakapalēmia ‘a e Pasifiki ‘o kapau ‘e mavahe ‘a Nu’usila mo ‘Aositelēlia mei he’ena ngaahi nga’unu fakapolitikale ‘I he kautaha ni.
 
Lolotonga hono tuku fakataimi ‘a Fis ikitu’a mei he PIF, ne hoko ko e taki he tukuimotu Melanisia, ‘i hono fokotu’u‘o e PIDF, ‘o ‘ikai kau ki ai ‘a Nu’usila mo ‘Aositelēlia.
 
“ ‘Oku poupou’i ‘e Tonga ‘a e ngaue ‘a e PIDF pea mo e ngaahi ngāue fakalakalaka ‘oku fa’u’aki ‘a e kautaha, ka ‘oku ‘ikai ‘uhinga ia ke fakafepaki ai ki he PIF pe ‘e fiema’u ‘a e PIDF ke hoko ko ha kautaha ia ke fili ai mo e PIF,: ko e me’a ia ‘a e Palēmia ‘o Tonga.
 
“ ‘Oku fiema’u ‘a e ongo kautaha ni ke na fengaue’aki ke na fakahoko hona takitaha fatongia ke tuha mo e taumu’a ‘oku na taukave’i.”
 
Na’e hoko atu ‘a e alea ‘a e ongo taki ni ki hono fakahā ‘e Hon. Samuela ‘Akilisi Pohiva ‘a e faka’amu ke fakaava ha ‘ofisi fakakonisela ‘o Tonga ‘iFisi.
 
“ ‘Oku mau faka’amu ke fakaava hamau ‘ofisi fakakonisela ‘i Fisi, koe’uhí ko Fisi ‘oku meimei senitā ki ai ‘a e Pasifiki, pea ‘e lahi ai ‘a e faingamalie ki he fefakatau’aki, fefononga’aki, takimamata, mo e ngaahi ‘elia kehe pē he konga ‘o ‘emau palani fakafeitu’u.”
 
‘E me’a atu mei Fisi ‘a e ‘Eiki Palemia ‘o Tonga he ‘aho ni, Tu’apulelulu 7 ‘o Me ki Nu’usila.
 
 
NGATA’ANGA
 
Tukuatu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644     Fax:  (676) 23 888; Ngaahi Faka’eke’eke- Email: This email address is being protected from spambots. You need JavaScript enabled to view it.