Tali ‘Ehe Kapineti ke Vahe Kolo ‘a Pātangata Featured
Kuo tali lelei ‘e he Kapineti ‘a ‘Ene ‘Afio ke vahe kolo mo fakalao’i ‘a e nofo ‘a e kainga ko’eni he ki’i kolo ki he fakahahake ‘o Nuku’alofa ‘a ia ‘oku ‘iloa ko Pātangata. Ko e fakaha ‘eni ‘e he ‘Eiki Palemia ‘i ha faka’eke’eke makehe mo e Ongoongo ‘a Letio Tonga ‘i he Efiafi Tusite ko hono 3 ‘o Ma’asi 2015
Na’e fakaha ‘e he ‘Eiki Palemia ko hono fakakakato ‘eni ‘a e ‘isiū na’a nau fetakai fuoloa mai moia ‘i he ngaahi ta’u kuo maliu atu pea kuo solova ia ‘i he ‘aho ni.
‘Oku ‘amanaki ke vahe atu ‘o taki pole ‘e 20 ki he konga pea kuo mahino mai foki ‘oku fu’u tokolahi ‘a e kakai ‘o fakatatau ki he lahi ‘o e ‘elia kelekele ‘i he feitu’u ni. Na’e me’a foki ‘a e Palemia koe toenga ‘o e kakai ‘e ‘ikai ma’u ‘api heni ‘e kumi leva ha feitu’u kenau fetukutuku kiai. Na’e toe fakahā foki ‘e he ‘Eiki Palemia ‘oku ‘i ai ‘a e kakai ‘oku nau nofo mai ki he feitu’u ni ka ‘oku nau toe ma’u ‘api pe kinautolu he ngaahi feitu’u kehekehe pe.
‘E malava foki ke taki ‘a e ‘uhila ki he feitu’u ni hili hano vahe kolo mo fakalao'i ‘a e ‘elia ni pea koe ta’u lahi ‘a e si’i nofo ‘a e kainga he kolo ni ‘o ‘ikai ha ‘uhila. Kuo ta’u lahi foki ‘a e laaulea ki he kaveinga fekau’aki moe ki’i falukunga kakai ko’eni ‘oku nau nofo mai ki he feitu’u ni pea koe taha’i ongongo fakafiefia ‘eni he kuo hoko ‘enau misi ‘o mo’oni.
Fakatatau ki he lau ‘a e tokotaha mei he kolo ni ‘oku ‘ikai loto ke fakaha hono hingoa, “kuo tali lotu ‘a e ‘Eiki ki he’enau faka’amu”.
