Hokohoko atu hono Tokonia 'e he Pule'anga 'a Vava'u Featured
Ko e siu fine'eiki 'oku fakahoko 'e fo hili 'a e matangi 'i Talau Vava'u. 'Oku mahino mai pe fiki 'a e 'ata 'o e maumau.
Nuku'alofa, 3 Ma'asi 2016. ‘Oku kei hokohoko atu pe ‘a e tokonia ‘e he Pule’anga Tongá ‘a e kainga ‘o Vava’ú hili ko ia ‘a e Saikolone ko Winston.
Fakatatau ki he fakamatala kuo tukuange mai mei he ‘Ofisi Fakafonua ki hono Tokangaekina e Ngaahi Fakatamaki (NEMO) ne ‘ikai ke lekooti ha lavea hili hono ‘ahia ‘e he saikolone ‘a Vava’ú, ‘a ia ‘oku ne fakahaa’i mai ‘a e ola lelei e ngaahi polokalama ‘a e Pule’angá ki hono faka’ai’ai ‘a e tokateu ki ha ngaahi fakatamaki fakaenatulá.
‘I ha lipooti mei he Talekita ‘o e NEMO, Leveni ‘Aho ‘oku ‘ikai ke fu’u fiema’u vivili ‘a e me’atokoni koe’uhí ne ‘i ai pe ‘a e ngoue ne ‘ikai ke maumau pea ‘oku kei ngäue pë ‘a e ngaahi falekoloá ke fakaai ‘a e fiema’u ‘a e kakaí.
Ka ‘i he mähina ‘e tolu mei heni ‘e fai e tokanga makehe ki ai tupunga mei he lahi ‘o e maumau ne hoko ki he ngaahi ngoue’angá.
‘I ha savea ne fakahoko ‘e he Potungäue Ngoué, Vaotaá pea mo e Toutai ne fakafuofua e ngaahi maumau ne hoko ki he ngaahi ngoue’anga mo e TOP$13,336,573 pea ne fokotu’utu’u ai e potungäué ke tufa ha ngaahi sila koane, pateta mo e vesitapolo pea pehë foki ki ha polokalama nö ‘a e pule’angá ma’ae kau faamá.
Ko e ngaahi maumau ki he ngaahi holo fakakoló, ‘apiakó mo e falemahakí ‘oku fakafuofua ki he TOP$58,640.
‘Oku fakafuofua foki ‘e toe hiki hake ‘a e lahi e mahu’inga ki he ngaahi maumau hili hono fakamä’opo’opo ‘a e lipooti ‘e he pule’angá.
Ne ‘osi tufa atu foki e tokoni ki he ngaahi fämili ne nau nofo ‘i he ngaahi fale hüfanga ‘a ia ne kau ki ai ‘a e kafu, vai inu, tainamu, pea ne lava foki hono tufa ha ngaahi tëniti ki he fämili ‘e 17 ne holo honau falé ‘i he matangí.
Kuo ‘osi fakahoko foki ‘a e fepuna’aki fakalotofonua ki Vava’ú ‘a ia na’e kaniseli ‘i he matangí pea kuo ulo foki ‘a e ‘uhila ‘a e motú kau atu ki ai mo e ngäue lelei ‘a e ongo kautaha telefoní ‘i Vava’u.
Ne fakamälo’ia foki ‘e he NEMO ‘a e tokoni mei he Pule’anga Nu’u Silá ki hono ‘utu ‘a e vaka ‘o e Kau Tau Malu’i ‘a ‘Ene ‘Afió ‘o lava ai hono fakafolau atu ‘a e ngaahi tokoni mei he pule’angá ki Vava’u.
Tukuatu mei he Potungäue Fakamatala 'Eá, Ma'u'anga Iví, Ma'u'anga Fakamatalá, Fakatamaki Fakaenatulá, 'Atakaí, Feliuliuaki 'o e 'Eá, Fetu'utakí
