Mahu’inga Ke ‘Ilo ‘A e Kakai Ki he Patiseti Fakafonua ^Featured

‘Oku ‘ikai foki ke puli ‘a e mahu’inga ‘a hono alea’i ‘o e patiseti ki he fonua he koe fokotu’utu’u faka pa’anga ia ‘oku ‘amanaki ke fakalele ‘aki ‘a e fonua ‘i he vaha’a ta’u fakapa’anga ‘a ia ‘oku kamata mei kamata’anga ‘o Siulai ‘o e ta’u kotoa ‘o ngata mei he ‘aho faka’osi ‘o Sune ‘o e ta’u hoko mai.

‘Oku lahi pe foki ‘a e lāulea ki he patiseti ka ‘oku fiema’u ke fakaloloto ange ‘a e ‘ilo ‘a e kakai ‘o e fonua ‘o tautautefito ki he mītia ki he ngaahi fakamatala fakaikiiki fekau’aki mo e me’a ‘oku ui koe patiseti pea ‘e malava mei ai kenau ‘eke ‘a e ngaahi fehu’i ‘oku kaunga totonu ‘a ia ‘e tokoni lahi ia ki hono fakamaama ‘a e kakai ‘o e fonua ki he hu’unga totonu ‘oku ‘alu kiai ‘a ‘enau pa’anga totongi tukuhau.

Makatu’unga ‘i he mahu’inga ‘o e ‘ata ki tu’a (transparency) mo e fetaliui’aki (accountability) ‘oku ‘i ai ‘a e fokotu’u heni ki he pule’anga pea ‘oku ‘i ai ‘a e tui ‘oku ‘amanaki tatau pē kiai ‘a e ngaahi kautaha mītia ke ‘uluaki fakalele ma’u pe ha ki’i polokalama (workshop) ‘a e kau faiongoongo pehē ki he ngaahi kupu kehekehe ‘o e mītia kau mai kiai moha ngaahi kupu felāve’i  fekau’aki mo e patiseti kimu’a pea toki fakahoko hono alea’i.

‘Oku ‘uhinga ‘eni ki he tafa’aki fakatekinikale ‘o e patiseti he ‘oku fiema’u ke huluhulu ke toe maama ange ki he kakai ‘o e fonua ‘a e fokotu’utu’u faka pa’anga mo e anga hono filihi ‘a e ngaahi fokotu’utu’u he ‘ata fālahi kae tautautefito ki he ngaahi kaveinga ‘oku fekau’aki mo e mo’ui ‘a e kakai. ‘Oku ‘uhinga ‘eni ki he ngaahi tukuhau mo hono founga, mo’ua ‘o e pule’anga, ngaahi fakamole tefito, ngaahi monu’ia (benefits) ‘oku ‘ata kiai ‘a e kakai mo e ngaahi alaa me’a pehē.

‘Oku mahino pe foki hono alea’i ‘i he Fale Alea pea mo hono fakamafola mai ‘o fanongo ki ai ‘a e kakai he letiō kā koe tokolahi taha ‘oku ‘ikai kenau si’i lave’i ‘a e ngaahi fakaikiiki tefito ‘a ia ‘oku makatu’unga mei ai ‘a hono fehu’ia ‘o e ngaahi kaveinga na’e totonu ke tomu’a fakama’ala’ala pē ia kimu’a ka na’e ‘ikai. ‘E tokoni foki ‘eni ki hono fakasi’isi’i ‘o e ma’uhala, lāunga mo fakasi’isi’i ‘a e tu’u lavea ngofua ‘a e pule’anga ki he fatongia faka fakaanga.

‘Oku tau lalaka atu māmālie atu pe foki ‘eni mo e temokalati pea ‘oku ‘i ai ‘a e ‘amanaki ‘e tali lelei pe ‘a e ngaahi ‘anau ‘oku ‘ohake ko’eni he koe fatongia pe ‘eni ‘o e pule’anga ‘o fakatatau mo e laumalie ‘o e fetalaiui’aki pea ‘oku tokolahi pē ‘a e kau taukei kuo ‘osi teu’i mei he Pule’anga kenau tokoni ka fakahoko ha ki’i polokalama pehe ni. ‘E malava pe foki ke fakahoko ‘eni ‘eha kautaha tokoni mei muli pe ko hotau ngaahi hoa ngāue.

Ko e fatongia pe foki ‘eni ia ke fakahoko mo fakahā pe foki ‘a e anga ‘o e fiema’u mo e faka’amu mei he ngaahi ‘inisitute (institutions) ‘oku nau fekaukau’aki ‘i he sosaieti ‘o hangē koe mītia ka ‘oku ‘a hono aofangatuku ‘e he Pule’anga he ‘oku ‘iate kinautolu ‘a e mafai.

Ko e me’a pe ‘e taha na’a kuo ‘osi ‘i ai ha fokotu’utu’u ia kiai ‘a e Pule’anga pea ko’ene toe fakalata ange ia.