'Uluaki Fā: Siaosi Tupou I & Konisitutone ‘o Tonga ^Featured

'Oku toutou fakamanatua foki 'e he fonua 'a hono foaki  'o e Konisitutone 'e he 'Uluaki Fa 'i he 'aho 4 'o Novema ta'u 1875 pea 'oku kei laukau'aki 'e he Tonga 'o a'u mai ki he 'aho ni 'a e makamaile faka-hisitolia koia 'a ia 'oku 'iloa ai 'a e Fo'i Piliote 'o a'u mai ki he aho ni.

Ko e Konisitutone foki koe siate folau ia 'a e fonua pea 'oku ne talamai fakapatonua 'a e ngaahi tefito'i tau'ataina 'a e fonua pehe ki hono pule'i 'enau koloa mo hono kakai pehe ki he fa'unga Pule'anga mo e founga hono fakalele 'a e fonua pehe ki he mavahevahe 'a e ngaahi mafai mo hono pule'i 'o e kelekele.

'Oku ha'i kotoa 'eni ki he tau'ataina mo e malu 'a e kakai 'a ia kuo 'osi fakatoka 'i he Konisitutone 'o Tonga talu mei he ta'u 1875 pea 'oku tukutuku'au mai hono lelei mo hono momona 'o 'au mai ki he 'aho ni.

Ko e liliu mo e  feliuliuaki koe konga ia 'o e vilo 'a e ve'eteka 'o taimi pea 'oku hoko 'i he taimi ki he taimi ka koe ngaue 'oku tolonga mo lelei 'oku mamalie pea faingata'a ke liliu 'o a'u ki he laui senituli.

Na'e malava foki ke hoko 'eni 'i he langimama'o 'Uluaki Fa pea 'oku totonu foki ke fai ha vakai ki he helo ko'eni 'o e fonua mo 'ene tukutukulaumea 'o 'ausia ai 'e Tonga 'a e taha 'o e ngaahi Konisitutone malu mo tolonga taha 'i he lalo mamani.

Na’e ‘alo’i ‘a Tāufaʻāhau ‘a ia na’e toe ‘iloa ko Tupou Maeakafaua Ngininginiofolanga ‘i he ‘aho 4 ‘o Tisema ‘o e ta’u 1797. Fakatatau ki he lau ‘a e kau fai histōlia, na’e ‘alo’i ‘a e tama ‘i Ha’apai ‘i Niu’ui pe ko Tongaleleka ‘i Lifuka. ‘Oku ‘i ai mo e ma’u tokua ko Tongatapu ‘i Fualu pea neongo ‘oku hoko ‘a e tipeiti lalahi ai ‘a e kau fa’u hisitōlia pehē ki ha’a ‘ilo’ilo he tala ‘o e fonua ka ‘oku ‘ikai tuku ‘a e fekeli ki he mo’oni 'o a'u mai pe ki he 'aho ni.

Ko e ‘Ene ‘Eiki ko Tupouto’a ‘a ia koe Tu’i Kanokupolu ia hono 17 pea ko ‘Ene Fehuhu ko Hoamofaleono pea na’e ohi hake pe ‘a e Tama ‘i he Fo’i ‘One’one ‘o makatu’unga ‘i he fekuki fakapolitikale ‘o e ‘aho koia.

Na’e fakanofo ‘a Taufa’āhau koe Tu’i Ha’apai ‘i he 1820 kimu’a pea hala ‘ene ‘Eiki. Na’a ne tali ‘a e Lotu Faka Kalisitiane pea papitaiso ia ‘i he ta’u 1827 ‘aki ‘a e hingoa ko e (Siaosi) ‘o tauhingoa ki he Tu’i Pilitānia ko Siaosi (King George). Na’a ne hoko ko e Tu’i Vava’u ‘i he ta’u 1833 hili ia ‘a e pekia ‘a hono leuleumāfana Fīnau ‘Ulukālala III ‘a ia na’e ‘iloa koe Tu’i Vava’u.

Na’a ne fakangata ‘a e nofo pōpula ‘a e kakai ‘o e fonua ‘i he ta’u 1835 pea na’e fokotu’u ‘a e Lao Vava’u ‘i he 1838 (Code of Vava’u) ‘a ia koe fuofua lao ia na’e tohi ‘i he fonua. Na’e hoko ‘Ene Langi Mama’o ‘one momoi ai ‘a Tonga ki Langi ‘i he ta’u 1839 (Tuku Fonua Ki Langi) 'a ia oku kei laukau ai 'a e fonua moe lotu 'i he 'aho ni.

Na’e lahilahi ke ‘Afio pe ‘i Veitatalo ‘i Vava’u he na’e melino mo tu’umalie ange ‘a Vava’u he ‘aho koia lolotonga ia ‘oku hoko ‘a e ngāngā’ehu mo e tau fakalotofonua ‘i Tongatapu. Na’e ngata ‘a e tau ko’eni ‘i he ta’u 1852 hili hano fakangata ‘e he ‘Uluaki Fā ‘a e moveuveu ‘i he fonua pea mo hono tali ‘e he tokolahi ‘a e Lotu Faka Kalisitiane.

Na’a ne fuofua Fakaava ‘a e fuofua Fale Alea ‘i he ‘aho 4 ‘o Sune 1862 pea ‘oku kei fakamanatua ‘o a’u ki he ‘aho ni koe ‘aho ‘o e Tau’atāina (Emancipation Day). Na’e hoko atu ai ‘Ene maa’imoa ki hono fatu ‘o e Konistūtone ‘o e fonua ‘a ia na’e fale’i ia ‘e he kau misinale pea na’e fakahā faka’ofisiale ‘i he ‘aho 4 ‘o Nōvema 1875 ‘a ia ‘oku fakamanatua moia ‘o a’u ki he ‘aho ni.

Ko e Konisitutone ‘o Tonga ‘a e Konisitutone motu’a taha ‘i he Pasifiki pea na’e fatu makatu’unga ‘i he fale’i ‘a e kau misinale pea mo hono ohi mai ‘a e ngaahi fakakaukau ‘i he Konisitutone ‘o Haui’i (Hawaii) mo e ngaahi konga mahu’inga ‘o e Konisitutone ‘a Pilitania.

Ko e nga’unu ‘eni ‘oku vikia lahi ‘i mamani mo e Tahi Saute he ko Tonga pe ‘a e fonua ‘e taha ‘i he Pasifiki na’e ‘ikai ke pule’i faka-kolonia he koe taimi ‘eni ‘o e fe’au’auhi ‘a e ngaahi fonua hau mo lalahi ‘o mamani ki hono fakakolonia'i mo pule’i ‘o e Pasifiki moe toenga 'o mamani.

‘Oku foki kotoa pe ‘eni ki he langimama’o ‘a e ‘Uluaki Fa mo ‘ene tali ‘a e fale’i mo e poupou ‘a e kau mininale kae tautautefito kia Misa Peka (Rev. Shirley Baker) na'a nau sio loloa pea ko hono tumutumu ko hono malu’i ‘a e tau’ataina ‘a e fonua mo hono kakai.

‘Oku kei tu’u ‘a e Konisitutone ‘o Tonga pea tolonga mai ‘o a’u ki he ‘aho ni pea koe konga si’i pe kuo liliu kae tautautefito ki he liliu ‘o e 2010 ka ‘oku kei vikia ‘ehe kau mataotao ‘i he mala’e ‘o e lao mo e fa’unga Pule’anga pehe ki he mala’e ‘o e Konisitutone ‘i he ‘uhinga ‘oku malu mo taau pea ‘oku hoko koe sipinga ‘i he Pasifiki.

'Oku 'ikai puli foki ia 'i Tonga ni mo mamani ko Siaosi Tupou I 'a e tufunga fonua 'o Tonga 'i he senituli 19 pea ko 'ene ngaahi visone mo'ene langimama'o 'oku hoko ai 'a Tonga koe fonua Tau'atāina pea koe Pule'anga faka-Tu'i pe ia 'e taha 'oku kei tolonga mai he Tahi Saute.

‘Oku tau fakamanatua he ‘aho ni ‘a e Konisitutone ‘o Tonga pea ‘oku ‘ikai ngalo ai ‘a e ‘Uluaki Fa mo ‘ene langimama’o pehe ki he kau misinale na’a nau poupou kiate ia pehe ki he kakai 'o e fonua na'a nau poupou mo tu'u tafa'aki he 'aho koia pea 'oku laukau ai ‘a e Tonga he ‘aho ni he koe fa’u ne tonu, hao pea malu.

Na’e Hala ‘a e Laione ‘o e ‘Otu Felenite ‘i he ta’u 1893 ‘i hono ta’u 96 pea na’e telio pe ‘i Mala’ekula.

'Oku mo'oni leva ai 'a e lea taka hotau ki'i fonua "Mapaki e Fā Kae Kei 'Alaha".