Sani mou Viki ^Featured

1. Tuku keu sani mou viki

‘A e Falefisi kei tāhuli ‘i taimi
Sia-ko-Tungī-Māna‘ia ‘oku ne tala
Sinaitakala-‘i-Langileka koe tupu‘anga

2. Koe fu‘u Manaui na‘e fakalanga mai
Huli ‘oe Tu‘i Vātoa moe Tu‘i Waciwaci
Fanga ‘i Tungua na‘e rōtaki mai
‘Oku tala he ‘umu ha‘amo ‘ae mafi

Tau/Kōlesi:

‘Isa! Funga Matahiva moe Kolohea
Mamanama‘u‘aho koe ‘api tupu‘a
‘Āmaile mo Tavahi hoku ‘ofa‘anga
Nofo ā Tafengatoto kau tēkina
Lepaheke ‘i Nuku‘alofa hoto namoa
 
Ko e ki‘i fakamatala nounou.

‘Oku hokohoko atu heni hono pulusi ‘ae ngaahi faiva ta‘anga/faiva maau mālie ‘ae fānauako he Tonga International Academy (TIA), ‘aia na‘a nau fai koe konga ‘enau ‘asainimeni kihe koosi “Faiva Ta‘anga: An Introduction to Tonga Poetry” he Tongan Studies Department he Semestā 1, 2018.

‘Oku tala ‘ehe hingoa koe ta‘anga/maau viki ‘eni, pea ‘oku ngāue‘aki lelei ‘ehe pulotu fa‘u ‘ae fa‘ahinga ‘e tolu ‘oe heliaki, ‘aia koe heliaki fakafetongiaki (qualitative, epiphoric heliaki) moe heliaki fakafekauaki (associative, metaphoric heliaki) moe heliaki fakafonuaki (constitutive. Metonymic heliaki).

‘Oku talanoa ‘ae pulotu fa‘u ki hono tupu‘anga, ‘uhinga moe hohoko mohu tala he’ene sania mo vikia hono ‘otu mātanga faka‘ofo‘ofa, fakalata mo fakalavetala, ‘aia ‘oku ne fālute kotoa ‘a Fisi mo Tonga, ‘o kau ai ‘a Tonga‘eiki / Tongatapu / Tongalahi mo Vava‘ulahi mo Ha‘apaiveu (kupu / veesi 1 & 2 & tau/kōlesi).

‘Oku kau ‘a e kupu/veesi 1, kohi/laini 4 he heliaki fakafetongiaki, ‘o ‘uhinga ‘ae fakalanga koe fakahakohako, moe kupu / veesi 2, kohi / laini 2 he heliaki fakafekauaki, ‘o hangē koe fekau‘aki ‘ae Tu‘i Waciwaci (Vasivasi) mo Fisi (Fiti) moe tau / kōlesi, kohi / laini 5, ‘o fa‘oaki ‘ae lea fafanga he lea namoa.

Hūfanga Professor Dr ‘Õkusitino Māhina
Professor of Philosophy, Anthropology and Art
Tonga International Academy (TIA) &
Vava‘u Academy for Critical Inquiry and Applied Research (VACIAR)