Tapuaki mo e Fakakoloa Ma'a Tonga: Katinali Soane Patita Mafi Featured
Katinali Soane Patia Mafi
Neongo ko hono fakanofo ‘o Soane Patita Mafi koe Katinali ma’ae Siasi Katolika Loma ka ‘oku hoifua kiai ‘a e Hau e Fonua mo Ha’a Moheofo, laumalie lelei kiai ‘a e Ho’ueiki mo e Kau Taki ‘o e Pule’anga pea fiefia ai ‘a Ha’a Matapule, pehe ki he kakai kotoa ‘o e ‘Otu Tonga. Ko e hisitolia foki ‘eni ki he fonua ‘a e faifaiange kuo hoifua ‘a Langi ka e kae fakafou mai ‘i he Tu’i Tapu ‘a e tapuaki ko’eni ki he Tahi Saute ‘o lave monu ai ‘a e fo’i piliote.
Tangane Soane Patita Mafi e lotu pea koe hala kuo papa ‘o talu mei hono tali ‘e he ‘Uluaki Fa ‘a e lotu Faka Kalisitiane pea tuku moe fonua ki Langi ‘i Pouono pea toki tu’uholoaki mai pe ‘a e tapuaki ‘one afuhia ‘a e ‘Otu Tonga ni. ‘Oku taku koe fonua Lotu pea ‘oku ‘ikai hano kikihi’i he ‘oku tau sio mata ‘i hotau kuonga ni ‘i he ta’au ‘o e tokaki mei ono’aho ‘a si’i kakai ‘o e fonua ni ‘i hono fai mateaki ‘a e lotu pea kuo ho’ata hono ola ‘i he ‘aho ni ‘o hopo hake ai ‘a fetu’u ngingila ‘i he lotofale ‘o e Siasi Katolika Loma ‘i Tonga.
‘Oku toe fakahisitolia foki he koe fanautama ‘a e fonua Sione Patita Mafi koe ta’u si’i taha ia ‘i he Kolisi ‘o e Kau Kaninali kuo fili ‘e Tu’i Tapu kenau kau atu ki hono tataki ‘o e Siasi kau ai mo hono fili ha Tu’i Tapu kene hoko atu hono tataki ‘o e Lotu Katolika hili ‘a e Tu’i Tapu Lolotonga Pope Francis. Na’e tupu hake pe ‘a Soane Patita Mafi ‘i ha famili lotu pe ‘i Nuku’alofa pea koe tokotaha ‘eni na’a ne fakatamaiki pea na’a ne malele pe ‘o fakatatau ki he ta’au ‘a e taimi fakatatau ki he fakamatala ‘a e ni’ihi ‘oku nau ‘ilo lelei ‘a Soane.
Na’e ako pe ‘a Soane he Kolisi ‘Apifo’ou pea ne hu ai ki he Kolisi St. Patrick ‘i Uelingatoni kimu’a pea ne toki hoko atu ki he Seminalio ‘i Fisi. Na’a ne toe hoko atu ki he Loyola College ‘i Maryland ‘o hoko atu ai ‘ene ako ki he tauhi mo e fale’i kakai pea ne foki mai ai ‘o ngaue ‘i he Seminalio ‘i Fisi kimu’a pea toki fakanofo ia ki he lakanga ‘Epikopo ‘o Tonga mo Niue. ‘Oku lahi ‘a e ngaahi talanoa melie ki he tokotaha ni ‘o kau ai ‘ene loto to mo fietokoni mo anga fakatokilalo ‘i he ngaahi ngaue ‘i tu’a mo fale pehe ki he lotu lolotonga hono taimi ‘i he Seminalio. 'Ikai ngata ai ka 'i he tapa kotoa pe na'a ne fua fatongia ai na'e 'ilonga 'ene taau fakasino, faka'atamai mo fakalaumalie 'o hange ha fakamelomelo ki he 'aho ni. Oku ‘amanaki foki ke fakanofo faka’ofisiale ‘a ‘Epikopo Soane Patita Mafi ki he lakanga Katinali ‘i he ‘aho ni ‘aho 14 Fepueli, 2015 pea ‘oku muimi folau atu ai ‘a e tokolahi ‘o e kakai ma’u tu’unga ‘i he fonua, lotu moe Pule’anga ‘o tumu’aki ‘aki ‘a e 'Afio tonu ai 'a e Fale ‘o Tupou ke fakamo’oni ki he ouau faka hisitolia ni.
