Ikuna Ako Mā‘olunga Woodridge ‘a e Siteisi Tonga´i he fe‘auhi faka-kolisi ngaahi faiva ‘o e Pasifiki´ ^Featured

‘I he kolisi ‘e 10 ne nau ‘osi lēsisita ke kau mai ki he fe‘auhi ‘o e ta‘u´ ni´ na‘e kau ‘a e kolisi ‘e 7 ‘i he siteisi Ha‘amoa´, 3 ‘i he siteisi Tonga´, 3 ‘i he siteisi Lalotonga´ pea mo e 2 ‘i he siteisi Mauli´.

Na‘a nau faka‘ali‘ali ‘a e ngaahi faiva fakame‘ite ma‘ae kau fakamaau´ pea mo e kau mamata ‘e toko 1,200 tupu.

Fakatatau ki he fakamatala ‘a e talēkita ‘o e fe‘auhi´ ko Gee Lagā, ‘a ia ‘oku fa‘ē Tonga mei Ha‘ateiho mo Havelu, “ko e taumu‘a ‘o e Polynesian Festival ‘o e 2019 ke tu‘uki ‘a e nofo faka-matakali he fonua´ ni pea ‘ikai ke ngata ai´, ka ko e mahu‘inga ‘o ‘etau nofo fe‘ofo‘ofani, uhouhongataha mo tau fefaka‘apa‘apa‘aki ke kātoanga‘i ‘a e taufatungamotu‘a hotau matakali Pasifiki ‘i Kuinisilani ma‘ae to‘utupu lolotonga´.”

Ko e fakamaau ma‘ae siteisi Tonga´ ko ‘Akesa Wonglyn, ‘a ia na‘e fā‘ele‘i ‘i Ha‘apai pea na‘a´ ne hiki ki Nu‘u Sila ki mu‘a ia pea ne hiki mai ki he feitu‘u Matātahi Koula (Gold Coast) ‘i he vahefonua Kuinisilani´ hili ia ‘ene fai fatongia ta‘u lahi ‘i he fe‘auhi fakakolisi koia ko e PolyFest ‘i ‘Aokilani, Nu‘u Sila.

‘Oku ‘iai ‘a e kolisi lalahi ‘e tolu ‘a Pilisipeini ‘oku tokolahi e fānau ako Tonga, ‘a ia ko e Groves Christian College, Marsden State High School pea mo e Woodridge State High School. Na‘a nau faka‘ali‘ali honau talēniti faiva ‘i he Tau‘olunga, Tau faka-Niua, Mā‘ulu‘ulu pea mo e Lakalaka. Na‘e toe fakamaau foki mo e teunga ‘o e kau faiva´.

Na‘e pehē ‘e he sekelitali ma‘ae kōmiti ‘a e komiuniti ‘o e kāinga Tonga ‘i Pilisipeini, ka ko e paionia foki ‘o e Kautaha ma‘ae kau loea Pasifiki ‘o Kuinisilani´ ko Leilehua Fā‘onevai, “ko e Polynesian Festival ‘o e ta‘u´ ni ‘oku ne fakafofonga‘i ha toe faingamālie ke vahevahe mo hakeaki‘i ‘a e ‘ilo ki he‘etau ngaahi faiva fakame‘ite ‘a Tonga mo e e ‘otu motu Pasifiki´ mo hotau fanga tokoua ‘i ‘Aositelēlia´ ni, lolotonga ia ‘oku tau kei paotoloaki ‘etau anga fakafonua pea pehē ki hono tukufakaholo ia ki he hako tupu ‘o e ka ha‘u´.”

Na‘e fai polokalama (emcee) ‘a e tangata faiongoongo Tonga, ka ko e ‘ōfisa fetu‘utaki foki ma‘ae kōmiti ‘a e komiuniti ‘o e kāinga Tonga ‘i Pilisipeini ko Sulieni Layt ‘i he fe‘auhi ‘o e
ta‘u´ ni, ‘a ia na‘e fakahoko ia ki he Edmund Rice Performing Arts Centre ‘i he ‘apiako ‘o e Kolisi St Lawrence’s.

‘Oku ‘amanaki lelei ‘a e kau talēkita ‘o e fe‘auhi Polynesian Festival ke hoko eni ko ha makatu‘unga ke fakalahi ange ‘a e fe‘auhi ‘o e ta‘u ka ha‘u´, lolotonga ia ‘oku faka‘au ke tokolahi ange ‘a e kakai Tonga ‘oku nau nofo ‘aunofo mai ki Pilisipeini fakataha mo e kakai mei he ngaahi matakali kehe ‘o e Pasifiki´.