27 ‘Epeleli, 2019. Na’e ha’elea ‘e he ‘Ena ‘Afifió, Kingi Tupou VI mo Kuini Nanasipau’u ‘a e polokalama hopoki ‘o e vaka fo’ou ‘a e Kautaha Tofa Ramsay ko e Taka-i-Pomana, ‘a ia na’e fakamonuka ‘e he Ta’ahine Kuini ‘a e lipiné, ‘i he efiafi Pulelulu ‘o e uiké ni ‘i he Uafu Taufa’ahau Tupou IV.
Hopoki ‘e he Ta’ahine Kuini Nanasipau’u Tuku'aho MV Taka-'i-Pomana Featured
Fakatatau ki he Pule Lahi (CEO) ‘o e Kautaha Vaka Tofa Ramsay, Tunamailangi Likiliki koe taumu’a tefito hono fakatau mai ‘o e vaka, ke fefolauaki hangatonu mei Tongatapu ki Vava’u ‘i he uike kotoa.
Pea ke toe malava ‘o folau atu ki he ongo Niua tu’o taha ‘i he māhina. “‘oku tau ‘amanaki ketau ngāue fakataha mo kimoutolu kotoa ke malava he kaha’u vave mai ke fakahoko a e folau tu’o taha he māhina ki Haamoa mo Fisi.”
Ko e vaka fo’ou ko ‘eni ‘oku fe’unga hono loloa mo e fute ‘e 225. Pea fe’unga mo e kau pasese ‘e toko 400 ‘e lava ‘o uta ‘e he vaka ni.
Na’e pehē foki ‘e Tuna ‘oku ‘osi fakanaunau kotoa ‘a e vaka ke fe’unga mo e fiema’u ‘a e kau folau mo e ngaahi uta. ‘A ia ‘oku malava ai ‘e he vaka ke uta ‘a e ngaahi koniteina fute ‘e 40, 20, pe 10 mo e ngaahi me’alele kekehekehe pē.‘Oku ‘i ai foki mo e mīsini hiki koniteina toni ‘e 10 ki hono fehikitaki ‘o e ngaahi uta lalahi. Taimi tatau ‘oku ‘i loto ‘a e ki’i lafalafa ‘alaminiume ki he pasese mo e uta, ki ha taulanga ‘oku kei faingata’a ke a’u kiai ‘a e ngaahi vaka lalahi.
Ko e taumu’a ngāue ‘a e Kautaha Tofa Ramsay ke tokoni ki he langa fakalakalaka faka’ekonomika mo fefakatau’aki ‘a e fonua. Kuo a’u eni ki he ta’u ‘e onongofulu tupu ‘a e faifatongia ‘a e Kautaha ko ‘eni ‘i he fonua.
Ko e ‘Eiki Vaka ‘o e MV Taka-i-Pomana ko Viliami Mafi.
- MEIDECC
