Vaka fōtolu fo'ou ma’ae kainga Niua ^Featured

Ko Dr. Halapua foki fakatatau ki he’ene fakamatala ki he ngaahi mītia koe tangata ia mei Niua Toputapu pea ‘oku ‘ikai ngalo ‘iate ia hono tupu’anga. ‘Oku makatu’unga heni ‘ene feinga holo he tukui fonua muli, ngaahi kautaha tokoni, ngaahi kaungāme'a mo kaungā ngāue mo e kainga Tonga ‘oku fakapaea ‘i muli ke okooko ha tokoni ki hono fo’u ‘o e vaka fōtolu ko’eni ma’a e kainga.

Ko poloseki foki ko’eni na’e kamata fakahoko pe ia ‘e Dr. Halapua lolotonga ‘ene kei hoko koe Fakafofonga Fale Alea mei he 2011 ki he 2014 pea ‘oku tui foki ‘a Halapua koe founga ma’ama’a taha pe ‘eni ke malava ai ke hokohoko lelei ‘a e fetu’utaki vaka mo e kainga he ‘oku lahi palopalema mo hono li'aki hono kainga.

Ko e vaka fōtolu foki ko’eni ‘oku ne ngaue’aki ‘a e lā ‘o ‘ikai misini pea ‘oku ‘ikai ke mahino foki pe koe ha hono fuloa ‘ene folau mei Tongatapu ki he ongo motu mama’o pea moe lahi ‘o e uta tene malava ke ‘ave. Ka neongo 'a e ngaahi pole kotoa 'oku mahu'inga foki ke fakahounga'i 'a e ngāue lahi mo faka-hisitōlia ko'eni he 'oku sai ange 'a e 'i ai 'a e vaka 'i he'ene hala.

Na’e toe fakamatala foki ‘a Halapua ‘oku totonu ke toe fakakaukau’i ‘e he ngaahi fonua ‘o e Pasifiki ‘a e founga ‘o e fetu’utaki vaka ki he tukui motu ‘i he Pasifiki he ‘oku ‘ikai ke hokohoko pea mamafa pea kau atu kiai mo ‘enau tu’u movetevete mo mama’o foki.

'Oku mahino foki koe vaka fo'ou ko'eni ma'ae kainga Niua 'e hopoki ia he uike ni.