Fakalilifu Loi FBI Poupou'i Mītiá ‘Ameliká Ta'u 3 ^Featured

 KŌLOMU ‘ANALAISO MĪTIÁ – Kimu‘a te‘ekiai ke fuakava ‘a Palesiteni Donald Trump ke hoko ko e palesiteni ‘o e pule‘anga ‘Ameliká ‘i Sānuali 20, 2017, na‘e ‘osi palani ‘e Palesiteni Mālōlō Barack Obama mo ‘ene kapinetí tenau fai ‘a e liukava. Ko e hulu ia ‘enau mamahi ta‘eloto ‘i he ulungia ‘enau fakafofonga Paati Temokalati, Mrs. Hilary Clinton, ‘i he fili palesiteni ‘i Novema, 2016.

Kā ko e fakalilifutahá ko e tō palapala ‘a e mītia ‘Ameliká ke fai honau fatongiá ‘oku nau faka-futofuta‘aki ‘o pehē koā ko e leleitaha kinautolu ‘i māmaní kotoá. Kuo laka eni ‘i he ta‘u ‘e tolu (3) ‘a e lohiaki‘i ‘o e mītiá ‘e he Talēkita FBI, James Comey – mo e toenga ‘o e kau ngāue mei he pule‘anga ‘o Obamá – tokua na‘e ukimai ‘e Trump ‘a e kau sipai Lūsiá ‘onau kaiha‘asi ‘a e fili palesitení mei a Clinton. 'I he lolotongá ni, 'oku kovitaha 'a e mītia 'Ameliká 'i māmani kotoa.

‘Oku fifili ai ‘a e tokotaha fa‘utohí ni: Ko e loi fulikivanu ‘a e kau taki faka-pule‘angá ni kuo faka-pūlou‘i ‘aki ‘a e kakaí mo e fonuá ‘i he ta‘u ‘e 3. Laka ‘i he $25 miliona hono faka‘ilo tu‘o 2 ‘o Trump ‘oku ‘asimai ai ‘a e fulikivanu ‘a e si‘aki ‘e he mītiá ‘enau tokāteline faiongoongó (journalism ethics) ko e fekumi ki he totonú.

Faka-Politikale‘i ‘o e Mītia ‘Ameliká

Na'e takimu'a ‘a e ngaahi kautaha mītia lalahi ‘o ‘Ameliká ‘i hono fakamafola ‘o e loi ‘a e FBI. Kuo mahino lelei ‘a ‘enau ta‘e fiefekumi kikihi ki he totonu ‘o ‘enau fakamatalá. ‘Oku kau atu ki ai ‘a e New York Times, CNN TV, CBS News, NBC News, Washington Post, mo e 90% ‘o e mītia ‘Ameliká. Na‘e ma‘u pale Pulitzer Price ai ‘a e New York Times ‘i he ‘enau toutou lipooti ‘a e tukuaki‘i loi ‘o Trump ‘e he FBI. Ko e 10% pe ‘o e mītiá na‘e kei poupou ki he tonuhia ‘a Trump. Kau ki ai ‘a e Fox News, Wall Street Journal, Washington Times, mo e The Federalist.

Kuo fakamo‘oni‘i totonu ‘e he ngaahi lekooti fakapulipuli ‘a e FBI na‘e sila‘í, ‘a e hala‘atā ke ‘iai ha momo‘i fakamo‘oní na‘e ukimai ‘e Trump ha kau sipai Lūsiá. Na‘e vilitaki pe ‘a Talēkita Comey mo Obama ke hokoatu ‘enau feinga liukava‘i ‘o Trump.

Lolotonga iá na‘e hokoatu pe ‘a e fakapelepele‘i ‘e he mītiá ‘a Talēkita Comey mo ‘ene kau kaungā liukavá ‘i he FBI. Ko e taimi eni na‘e totonu ke fakatotolo kikihi ai ‘a e mītiá kenau mahalo‘i ‘a e fakamatala loi ‘a e FBI. Ko e ta‘u ‘e 3 kakato ‘a e poupou‘i ‘e he mītiá ‘a e feinga liukava ‘a Talēkita Comey mo e Paati Temokalatí, kau ai hono faka‘ilo tu‘o ua ‘o Trump ka e kei hao pé.

Mītia Fulikivanu, Temokalati Fulikivanu

Kuo palakū e ngāue ‘a e mītiá ‘Ameliká he ‘ikai kenau fai fatongia ko e “kulī-le‘ó” ‘o e pule‘angá temokalati. Kuo nau hoko kinautolu ko e “kulī-pele” ‘a e FBI mo e kau taki mei he pule‘anga ‘o Obamá. Tuku honau fatongiá ki he kakaí ‘i he ‘enau tui ta‘e-hu‘uhu‘u ki he fakamatala mei he kau taki ‘i pule‘angá mo e FBI.

‘Oku falala‘anga ‘a e mītiá ko e va‘a hono fā (4) ‘o e pule‘angá. Tānaki ki he Fale Aleá (legislative); taki pule‘angá (executive); Potungāue Laó (judiciary). Ka kuo nau kaungā lohiaki‘i ‘a e kakaí ‘o e fonuá ke poupou‘i e loi ‘a e FBI, pea ke liukava‘i ‘a e palesiteni na‘e fili tonu ‘e he kakaí. Kuo mole ai ‘a e falala ‘a e pule‘anga temokalati ki he mītia ‘okú ne siofi ‘a e pule‘angá.

Ko e hia talisone ‘a e tu‘unga maumau lao ‘a e FBI pea poupou‘i ‘e he mītiá. Tā ko e fielau hono ui ‘e Trump ‘a e mītiá ko e “fake news.” ‘Oku ‘ikai kenau faiongoongo fakatotolo ke fekumi ki he totonú. ‘Oku nau fakapikopiko ‘o anga‘aki ‘a e faka-kāinga ‘enau faiongoongó.