Tokoni Komipiuta mo Tulekitoa 'a Siaina ki he Pule'anga Tonga Featured
14 Sanuali, 2022. Na'e foaki 'e he Pule'anga Siaina 'a e me'a'ofa komipiuta 'e 200 mo e tulekitoa 'e 8 ki he Pule'anga Tonga pea na'e fakahoko 'a e ouau ko'eni 'i he Senita Konivesio Fa'onelua 'i he 'aho Pulelulu ko hono 12 'o Sanuali ni.
Ko e me'a'ofa foki 'eni mei he kolo lahi ko Dongguan 'i he Vahenga Guangdong pea na'e foaki 'a e me'a'ofa ko'eni 'e he 'Amipaaitoa 'a Siaina ki Tonga Cao Xiaolin ki he 'Eiki Palemia 'o Tonga Siaosi Sovaleni.
Na'e fakamo'oni foki 'a hono foaki 'o e me'a'ofa ni 'e he 'Eiki Palemia mo e 'Amipasitoa Siaina pea koe konga 'uluaki 'eni 'o e tokoni 'a Siaina ki he Pule'anga fo'ou fakatatau ki he me'a 'a e 'Amipasitoa Siaina 'i he ouau ko'eni.
Na'e kau foki he me'a 'a e 'Amipasitoa Siaina 'ene fakapapau'i 'oku kei hokohoko atu pe 'a e tokoni 'a Siaina ki Tonga 'o kau ai 'a e fale ma'a e ifi 'a e Kautau 'a 'Ene 'Afio pehe ki he nanau tokoni ki he Potungaue Kasitomu ki hono sivi 'o e ngaahi uta 'oku hu atu mo hu mai ki Tonga ni he kau'afonua mo e ngaahi tokoni kehe pe.
Ko e ngaahi tokoni ko'eni 'oku tufa ia ki he Potungaue Ako mo e ni'ihi e ngaahi Potungaue 'a e Pule'anga mo e ngaahi ako he sekitoa taautaha pehe ki he ni'ihi 'o e ngaahi vahenga fili.
Na'e me'a 'a e Palemia 'o fakamalo'ia e tokoni ko'eni 'a Siaina mo fakapapau'i 'a e tukupa 'a Tonga ke hokohoko lelei atu 'a e va fengaue'aki vaofi mo ola 'a Tonga mo Siaina.
