Hikihiki e Totongi ‘o e Lolo Neongo e Tokoni Featured
17 ‘Aokosi, 2021. ʻOku fakaʻamu ʻa e Pule Fe’unga ke fakaha ki he Hou‘eiki mo e Kakai ‘o e Fonua ʻa e hoko atu e hiki ki he totongi ‘o e lolo, neongo ‘oku laka he $5 miliona ‘a e tokoni kuo tukupa ke fakahoko ke pukepuke hifo hono mamafa.
Ko e uesia faka‘ekonomika mei he Koviti 19 na‘a ne fakatupu e fetookaki lahi ‘i hono ngaohi mo hono fakataua ‘o e lolo. Naʻe iku heni o tolalo ‘aupito e fakatupu lolo ʻi Maʻasi 2020, fakatatau ki he totongi ʻavalisi ‘o e lolo mata (Dated Brent Crude) ki he pa‘anga ‘Amelika USD$20 ki he talamu.
Koe‘uhi foki ko e mafola ʻa e vailasi Koviti-19 na‘e uesia lahi ai e fefolauʻaki mo e fefakatauʻaki, pea hoko foki ai e holo lahi ki he totongi ‘o e lolo mo e ngaahi koloa lolo.
Neongo ia, naʻe kamata ke toe hiki hake ʻa e totongi ʻi he konga kimuʻa ʻo e taʻu ni makatu‘unga he ‘uhinga ʻe tolu:
i). Ko e maau mo hono tufaki ‘o e huhu malu‘i Koviti-19
ii).Kamata ke ola e ngaahi polokalama fakaakeake fakaʻekonomika tautautefito ʻi he ngaahi fonua tu‘umalieange, pea mo e
iii). Tu‘utu‘uni ‘a e Kautaha ‘o e ngaahi Fonua Fakatupu Lolo (Organization of Petroleum Exporting Countries, OPEC) ke fakangatangata ‘i hono haka mo fakatau atu e lolo ki he maketi fakavaha‘apule‘anga.
Ko e ʻavalisi fakamahina ʻo e totongi lolo mata ne holo ‘i Ma‘asi mo ‘Epeleli 2020 ki he pa‘anga Amelika USD$20.87 ki he talamu, ka ne toe kamata ‘ene hikihiki ‘o a‘u ki he USD$41.52 ki he talamu (‘avalisi ‘o ‘Okatopa 2020), pea makape mei ai ki he USD$65.70 ki he talamu (‘avalisi ‘o Ma‘asi 2021) ‘o tau a‘u mai ko eni ki he USD$$74.29 ‘i Siulai ta‘u ni.
Koe‘uhi ko e ngaahi hikihiki ko eni mo ‘ene uesia e fonua, na‘e feinga leva e Puleʻanga ke tokoni ki hono matu‘uaki ‘e he Kakai hono mamafa, ʻaki ha tokoni seniti 5 ki he lita ‘i he totongi lolo ‘o Me–Sune. Na‘e to‘o foki mo e Tute ‘Ekisia ‘o e lolo ‘aki e seniti 10 ki he lita ‘i he totongi lolo Siulai–‘Aokosi.
Ko e holo ko eni e tute ‘ekisia ‘oku fakafuofua ke laka hake ‘i he $4.7 milliona ‘o e pa‘anga hu-mai fakata‘u ‘a e Pule’anga ‘e ‘ikai toe tanaki ko e tokoni ke kei malava fuesia e mamafa ‘a e lolo.
Neongo e ngaahi tokoni ko ‘eni, kapau ‘e kei hokohoko atu ʻa e hiki ki ‘olunga ʻa e totongi fakavahaʻapuleʻanga, ʻe iku ki ha hiki ‘a e totongi ‘o e lolo ki he mahina ʻAokosi – Sepitema.
Ka ‘oku ‘i ai pe e ‘amanaki lelei –naʻe holo ʻa e totongi lolo mata ʻi he konga ki muʻa ʻo ʻAokosi pea kapau ʻe kei hokohoko atu pe he halanga ko ia, te tau ʻamanaki ki he holo ‘a e totongi fakamovetevete ‘o e lolo ʻi he mahina katuʻu.
