Luva atu ‘a e fuofua Tu’utu’uni Ngāue Fakafonua ‘a Tonga ma’áe To’utupú mo e Palani Ngaue 2021-2025 ^Featured

‘I he me’a ‘a e ‘Eiki Sea ‘o e Fale Aleá ka ko e fakaafe fakalangilangi ‘o e ‘ahó Lord Fakafanua na’a ne pehē ko e koloa mahu’inga taha ‘a Tongá ko hono kakaí pe ko e to’utupú pea kapau he’ikai ke fakatokanga’i honau ngaahi mahu’ingá mo ‘enau ngaahi faka’amú te ne uesia lahi ‘a e tu’unga fakasōsiale mo e faka’ekonōmika ‘a e fonuá.

“’Oku poupou’i ‘e he Pule’angá mo e kau taki ‘o e fonuá ke fakaivia’i kimoutolu ‘aki ha ngaahi naunau faka’atamaki ke mou lava ‘o tau’i ‘a e ngaahi vaivai ’anga fakasōsaieti mo e ngaahi nunu’a kovi o e masiva faka’ekonomiká.”

Na’a ne fakamamafa’i foki ‘a e mahu’inga ‘o e kaveinga ‘o e ta’u ni, ko ho’o koloa lelei taha ho’o mo’ui leleí.

“‘Oku fiema’u ke tau fakatokanga’i ‘a e tokolahi ‘o e to’utupú pea mo mahu’inga’ia ‘i he ‘enau mo’ui leleí kae mo’ui lelei ‘a Tonga kae pehē foki ki he Tonga ‘i he kaha’u. Kapau tenau mo’ui lelei ‘i he sinó, ‘atamaí mo e laumālié ‘e ho’ata atu leva ‘a e ‘ulungaanga mo e to’onga ‘oku lelei,‘o kau ai ‘a e faka’apa’apá, poto he tauhi vā´ mo e fakatōkilalo foki, ko e faa’i kavei eni ‘a e Tongá ‘i he ‘etau nofo fakafāmilí pea ‘i he kolo mo e fonua.”

Taimi tatau na’e fakahā ai ‘e he Tokoni Talēkita Seniale (Deputy Director General) mei he SPC Dr. Paula Vivili ‘a e mahu’inga ‘a e kaveinga ‘o e ‘ahó ki he to’utupú koe’uhí ‘oku ne fakahaa’i mai ‘a e ngāue mateaki ‘a e to’utupú ke nau langa hake ‘a e fonuá pea pehē foki ke fakakau ‘a e to’utupú mei he ngaahi tapa kehekehe ‘o e mo’uí ke tau’i ‘a e ta’au ‘o e Covid-19 pea mo e ngaahi pole ‘oku nau fe’ao mo iá.

“’Oku ‘ova hake he vaeua ‘a e tokolahi e kakai ‘i he Pasifikí ko e to’utupú ‘a ia ko e ta’u 25 ia ki lalo pea ‘oku mau lave’i ‘oku pehē pe ‘a Tonga koe’uhí ‘oku laka hake ‘i he peseti ‘e 40 ‘a e to’utupu ‘o Tonga ‘oku iiki hifo ‘i he ta’u 18 fakatatau ki he polokalama huhu malu’i Covid-19.”

Na’a ne fakamālō’ia ‘a e Pule’anga Tongá ‘i he’enau falala ange ki he SPC ke nau fakapa’anga mo tokoni’i ‘a e ngāué pea pehē foki ki he tokoni ‘a e Pule’anga Nu’usilá ki he SPC ‘o lava ai ‘a hono fa’u ‘a e tu’utu’uni ngāué pea mo e palani ngāué.

Tu’utu’uni Ngāue Fakafonua ‘a Tonga ma’ae To’utupu mo e Palani Ngāue 2021-2025

Fakatatau ki he Tokoni Talēkita (Deputy CEO) ‘oku ne tokanga’i ‘a e Va’a ki hono Fakalakalaka’i ‘a e To’utupú Sinama Tupou Fuao, na’e fatu ‘a e tu’utu’uni ngāue ko ‘ení ‘o kamata mei he konga ki mui ‘o e ta’u 2018 ‘o fakapa’anga ‘e he United Nations Educational, Scientific and Cultural Organization (UNESCO) ‘o a’u ki he 2019.

Na’e fakahoko ai ‘a e ngaahi talatalanoa (consultations) ‘o tataki ia ‘e Dr. Leonaitasi Hoponoa ‘o a’u ki he Ongo Niuá. Ko e talatalanoa ko ‘ení na’e ‘omai ai ‘a e ngaahi fiema’u vivili ‘a e to’utupú, ngaahi matu’á, pule’angá pea mo e Ngaahi Kautaha ‘ikai Fakapule’angá (NGOs) ‘a ia ‘oku ‘asi kotoa ia ‘i loto ‘i he tu’utu’uni ngāué.

Na’e hoko atu leva ‘e he UNFPA (United Nations Population Fund) ‘a hono fakapa’anga ‘a e tālangá ke fakakakato ke a’u ki he ongo Niua ‘i he 2020.

Hili e kakato ‘a e ngāué na’e tokoni leva ‘a e SPC ‘i hono liliu  ‘o e tu’utu’uni ngāué ki he Lea Faka-Tongá, pea mo hono fakapa’anga ‘a e polokalama ki hono luva atu ‘o e tu’utu’uni ngāue ni.

‘Oku ma’u atu foki ‘a e tatau ‘a e Tu’utu’uni Ngāué ‘i he Lea Faka-Pilitania pea mo e Lea Faka-Tongá.

- MEIDECC