Fakafuofua toko 247 kau pāsese ‘e tu’uta 'aho 3 Ma’asi Featured
25 Fepueli, 2021. ‘Oku fakafuofua ki he toko 247 ‘a e tokolahi ‘o e kau pāsese mei he ngaahi fonua kehekehe ‘e tolu ‘e tu’uta mai ki Tongá ni ‘i he ‘aho Pulelulu uike kaha’u, Ma’asi 3.
Ko e ngaahi vakapuna ki he uike kaha’ú ‘e tu’uta mai ia mei ‘Okalani Nu’usila, Brisbane, ‘Aositelēlia pea mo Nadi, Fisi.
Fakatatau ki he fakamatala ‘a e Pule Lahi ‘a e Potungāue MEIDECC, Paula Pouvalu Ma’u, kuo ‘osi ngāue ‘a e kōmití ke vahevahe ‘a e tokolahi ‘o e kau pāsese tenau omi ‘i Ma’asi 3 ke fakapapau’i ‘e ‘i he fika ofi ki he 250.
“Ko e tokolahi ‘a e kau pāsese mei Fisí kuo ‘osi fakapapau’i he taimi ni ko e toko 80, 101 mei Nu’usila pea mo e toko 66 mei ‘Aositelēlia ‘a ia ko e toko 247 ia tuku kehe kapau ‘e toe ‘i ai ha liliu.”
Ko e tokolahi ‘o kinautolu kuo ’osi fakafoki mai ki Tongá ni talu mei Siulai ‘o e ta’u kuo ’osí ko e toko 1, 731.
‘I he’ene a’u mai ki ‘aneafí, ko e tokolahi ‘o kinautolu kuo nau lēsisita mai ‘i he uepisaití ‘a e pule’anga ke nau foki mai ki Tongá ni ko e toko 2, 795.
