Tali 'e he Pule'anga ke tokoni $60 Miliona ki he Fakaakeake 'a e Fonua ^Featured

Ko e tokoni fakavavevave eni, mo e poupou ‘a e Pule’anga ‘o ‘Ene ‘Afio, ‘a ia ‘oku fakataumu’a ki he kakaí taautaha, pea mo e ngaahi kulupu, kuo uesia ‘i he ta’au ‘o e Fokoutua COVID – 19.

Ko e tokoni ko ení, ‘e tukuatu ia, ke pouaki ‘a e ngaahi tafa’aki tefito ko ení :-

a. Ko e Fakala’ā ‘i Siamelie (Investment) ke tokoni ki hono taliteke’i, mo mapule’i, ‘a e Fokoutua COVID-19, mo hono ngaahi ta’aú;

e. Ke leva’i, ‘a e mole faka’ikonōmiká, ‘o fou ‘i hono tokoni’i, ‘a e ngaahi tefito’i sekitoa faka’ikonōmiká, mo e ngaahi pisinisí, ‘a ia ‘oku mātu’aki uesiá;

f. Ke matauhi ‘a hono fakalele, ‘o e ngaahi ngaue, ‘a ia ‘oku mahu’ingá, mo ‘ikai lava ke tukú (essential services);

h. Ke pouaki, ‘a e tu’unga matatali fakapa’angá, mo poupou’i, ‘a e ngaahi kulupu, ‘a ia ‘oku tu’u lavea ngofuá.

Ko hono vahevahe ‘o e tokoní, ‘e fakafou atu ia, ‘i he malumalu mo e ngaahi founga ngāue, ‘a e ngaahi fakataha’anga (cluster) lolotongá:-

1) Fakataha’anga ki he Mo’ui, Vai mo e Tauhi e Ma’á (Health, Water and Sanitation Cluster)

2) Fakataha’anga ki he Fakaakeake Faka’ikonomika mo Fakasosiale  (Economic and Social Recovery Cluster)

3) Fakataha’anga ki he Malu ‘o e Me’atokoní, pea mo e Ma’u’anga Mo’ui (Food Security and Livelihood Cluster)

4) Fakataha’anga ki he Ako (Education Cluster)

5) Fakataha’anga ki he Hao mo e Malu’i (Safety and Protection Cluster)

6) Fakataha’anga ki he Ngaahi Ngaue, ‘oku ‘ikai lava ke tukú (Essential Services Cluster)

7) Fakataha’anga ki he Nofo’anga (Shelter Cluster)

8) Fakataha’anga ki he Tekinolosia ‘o e Fetu’utaki (Telecommunications Cluster)

9) Fakataha’anga ki he Fakahoko Ngāué mo e Fakafehokotakí  (Logistics and Coordination Cluster)