Foaki pale fakalangilangi 'Honorary Fellow' kihe sikola Tonga Featured
Professor Hūfanga-He-Ako-Moe-Lotu Dr 'Ōkusitino Māhina.
18 'Okatopa, 2021. Kuo foaki 'ehe kautaha fekumi moe fakatotolo fakamamanilahi koe Association for Social Anthropology of Oceania (ASAO) 'ae pale fakalangilangi koe Honorary Fellow kihe sikola Tonga ko Professor Hūfanga-He-Ako-Moe-Lotu Dr 'Ōkusitino Māhina.
'Oku kau atu 'eni 'a Professor Hūfanga-He-Ako-Moe-Lotu he kau sikola 'e tokotolu Moana 'Ōsēnia kuo foaki kiai 'ae pale fakalangilangi fakataha moe ongo sikola 'iloa Ha'amoa ko Professor Dr Malama Meleisea he 2016 mo Maualaivao Professor Albert Wendt he 2019.
Na'e makatu'unga 'ae pale kuo foaki he'ene ngaahi ngāue ma'ongo'onga mo 'aonga lahi mo mo'oni fakaako he mala'e 'oe kalatua moe hisitōloa, ako moe fakatotolo, 'aati moe litilesā, moe 'ikonōmika fakapolitikale.
Na'e toe kau tefito heni 'ene ngāue fakaako fo'ou mo makehe he mala'e 'oe filosofia tu'ufonua mo tupu'a fakaTonga moe fakaMoana 'Ōsēnia, 'aia 'oku 'iloa koe Filosofia Tā-Vā 'oe 'Iai (pē Time-Space Philosophy of Reality).
Kuo ne 'osi fa'u foki 'ae ngaahi tohi, kaungā fa'u 'ae ngaahi tohi, 'ētita mo kaungā 'etita 'ae ngaahi tohi moe ngaahi senolo fakataha moe ngaahi vahe tohi he ngaahi tohi moe ngaahi 'atikolo he ngaahi sēnolo lahi.
'Oku kau ai moe ngaahi tohi kuo pulusi mo paaki ai 'ene ngaahi maau moe ta'anga he lea Tonga kuo liliu 'ae ni'ihi kihe lea 'Ingilisi moe Maori.
'Oku kaimu'a 'a Maui-TāVā-He-Ako Professor Dr Tēvita O. Ka'ili moe kau sikola Tonga moe Moana 'Ōsēnia tokolahi fakataha mo Professor Hūfanga-He-Ako-Moe-Lotu hono takukave 'ae Filosofia Tā-Vā 'oe 'Iai he ngaahi konifelenisi fakaako mo 'enau ngaahi fekumi moe fa'utohi.
Kuo toe mafola lahi foki 'ae Filosofia Tā-Vā 'oe 'Iai 'i mamani lahi he ngaahi mala'e fakaako kehekehe kae tautefito kihe ngaahi 'univēsiti 'i Nu'usila, 'Asitelēlia, Fisi, Hauai'i, mo 'Amelika.
