Fakapapau‘i Fo‘i‘akau ki he Fokoutua COVID-19; Kei Sivi‘i Faito‘o Huhu-ta‘ofí (Vaccine) ^Featured

Kōlomu ‘Analaiso Mītiá – Mei he kamata mafolamai ‘a e COVID-19 na‘á ku tānaki mei he ngaahi pulusi ‘a e mītiá ki he fakalakalaká ‘o e ngaahi kautaha hu‘ivaí (pharmaceuticals) ‘oku nau fe‘au‘auhi ki hono hu‘i ha faito‘o (medication) mo ha huhu-ta‘ofí (vaccine).

Na‘e ‘amanaki lelei ki he kautaha NOVAVAX mei Mā‘asi ‘o e ta‘ú ni mahalo na‘á lava ‘o maau ‘enau faito‘o huhu-ta‘ofi ‘i he māhina ‘e fā ki he māhina ‘e onó. Ko e pangó ‘oku ‘ikai ke fakangofua ‘e he Potungāue Mo‘ui Leleí ‘o ‘Ameliká (CDC) ke fakavave‘i ‘a e ngaahi sivī pea toki paasi.

‘I he lolotongá ni, ‘oku kei tokolahi ‘a e ngaahi kautaha hu‘ivaí ‘oku nau feinga ke maau ha ‘uluaki huhu-ta‘ota‘ofi ‘o e COVID-19, ‘oku fakamahalo‘i ki Mē pe ko Sune, 2021.

‘Osi hono sivi‘i ‘enau ngaahi pepa fakatotoló pea toki ngofua ke huhu ‘ahi‘ahi‘i ‘i he fanga monumanú; ka e toki hokoatu ki hono sivi ‘ahi‘ahi‘i ‘i he kakaí. Toki ngofua kenau hu‘i e faito‘o ki he huhú ke tufaki ki māmani.

‘I he ‘eku lipooti ‘i heni ‘i Mā‘asi 20, 2020, na‘e ‘ohake ‘e Palesiteni Trump ‘a e fo‘i‘akau ki he malēliá ko e Palēkuineli (plaquenil). Ko hono hingoa faka-saienisí ko e “haitolōkisī-kololokuiní” (hydroxy-choloroquine) kuo faka-‘aonga‘i ‘i Falanisē, Kōlea Tongá, pea mo Siainá ki he COVID-19.

‘Oku ngāue ‘a e toketā mo‘ui lelei ko Didier Raoult, M.D., Ph.D., ‘i he ‘Iunivēsiti Aix-Marseille, Falanisē, pea na‘á ne ‘osi tu‘utu‘uni faka-toketā (prescribed) ‘a e haitolōkisī-kololokuiní ki he ‘ene kau fokoutuá COVID-19 kuo laungeau honau tokolahí.

Faito‘o Haitolōkisī-kololokuini (Hydroxy-chloroquine)

Ka ko e ongoongo leleitahá ko e faito‘o ki he kau fokoutuá COVID-19 kuo malava ‘o faka-‘aonga‘i ‘o e fo‘i‘akau haitolōkisī-kololokuiní na‘e matafi ai ‘a e mahaki malēliá. Kuo laka ‘i he ta‘u eni ‘e 50 hono faito‘o‘aki ‘o e malēliá, pea kuo ‘ahi‘ahi‘i ‘e he kau tōketā ‘e ni‘ihi ki he COVID-19 he kuo ‘osi laisení.

Pea kuo mo‘ui ‘a e kau fokoutua tokolahi ‘i hono hu‘i fio ‘o e haitolōkisī-kololokuinī mo e faito‘o faka‘auha vailasi ko e ‘asifilōmaisini (azithromycin), ‘oku kāinga mo e faito‘o penisiliní.

‘I he faiongoongo fakamuimuitahá ‘a Zachary Stieber (July 2, 2020) ‘o e The Epoch Times, na‘á ne ‘omai ‘a e lau fakamo‘oni ‘a e tokoni-palesiteni ‘o e Henry Ford Health System ‘o e vahefonua Michigan, pea ko e toketā tafa-neavé (neurosurgeon), Dr. Steven Kalkanis, M.D.

“Ko e ngāue ‘a e kau toketā mo e kau siaenisí, ‘oku mau hanga ki he ola ‘o e fakatotoló ke ma‘u ha fakamatala mo ha faka‘uhinga lolotó,” lau ‘a Dr, Kalkanis. “Pea ko e ola ko ‘ení ‘oku ‘asi tasilomai ‘a e ‘aonga ‘o hono faka-‘aonga‘i ‘o e faito‘ó ni (haitolōkisī-kololokuinī) ki he kau fokoutuá ‘i falemāhakí.

‘Analaiso ‘o e Sivi Kau Fokoutuá: Mā‘asi 10 – Mē 02

“Ko ‘emau ‘analaisó ‘oku ‘asimai ai ‘oku fakahaofi ‘a e mo‘ui tokolahi ‘i hono faka-‘aonga‘i ‘o e haitolōkisí-kololokuiní,” hokoatu ‘a Dr. Kalkanis. Na‘e sivi ‘ahi‘ahi‘i ‘e he kau fakatotoló ‘a e kau fokoutua ‘e toko 2,500 (Mā‘asi 10 – Mē 02) na‘á nau tākoto ‘i falemahaki Henry Ford Health System.

‘Oku mahino ‘a e mālohitaha ‘a hono hu‘i ‘o fio ‘a e haitolōkisí-kololokuiní mo e faito‘o faka‘auha vailasi koe ‘asifilōmaisiní (azithromycin).

Na‘e mo‘ui ‘a e 66% ‘o e kau sivi ‘ahi‘ahí na‘e ‘oange takitaha pē ‘o e ongo faito‘ó. Ka ‘i hono hu‘i fio kinauá na‘e ‘aluhake ‘o 71%, ko e fakamatala ia ‘a e kau toketā na‘á nau tauhi ‘a e kau fokoutuá ‘i he sivī.

“Ko e ‘analaisó ni kuo ‘osi fokifokihi mo sivi‘i ‘e he kau mataotaò (peer reviewed),” tānaki fakamatalamai ia ‘a Dr. Marcus Zervos, ko e taki ‘o e Ngaahi Mahaki Pipihí. Na‘e kaungā fa‘u-tohi ‘e Dr. Zervos mo Dr. Samia Arshad – taukei ‘o e ngaahi mahaki pipihí – ‘a e pepa fakatotolo ko ‘ení ‘a e Henry Ford Health System.

“‘Oku makehe ‘emau ‘analaisó ko ‘emau ‘oange ‘a e faito‘ó ki he kau fokoutuá ‘i he vavetahá (te‘ekiai ‘osi houa ‘e 48),” lau ‘a Dr. Zervos. “Na‘e fakapapau‘i ‘a e sivi‘i ‘e he kau mataotaó ‘emau pepa fakamatalá ‘o ‘emau fakatotoló. ‘Oku mau makehe ai mei he ngaahi fakatotolo kehé ‘oku ‘ikai tokolahi fe‘unga ‘enau kau fokoutuá ‘oku nau kau ki he siví.”

Dr. Anthony Faucci, Fale'i Mo'ui Lelei ki he Palesitení, ne tu'olahi 'ene faka-felekeu ki he fakamatala 'e Trump 'a 'ene faka-tu'amelie ki he fo'i'akau haitolōkisī-kololokuini (hydroxy-chloroquine). Kuo fuoloa hono laiseni ki he mahaki malēliá 'i he 1955 pea kuo faka-'aonga'i 'e he kau toketā tokolahi ki he ngaahi mahaki kehekehé. Pea tu'olahi 'a e fepakipaki 'a e ngaahi fakamatala 'a Dr. Faucci 'o puputu'u ai 'a e kau faiongoongó.

Fakatanga‘i ‘e he Mītiá & Kau Toketā

Ka e hili hono tu‘uaki ‘e Palesiteni Trump ke vakai‘i ‘e he kau toketā ‘Ameliká ‘a e haitolōkisī-kololokuiní ke faka‘aonga‘i na‘á mo‘ui ai ha kakaí, na‘e faka-anga‘i ‘e he mītiá ‘i he mata‘ā‘ā ‘enau taaufehi‘a ki he palesitení. Na‘e ‘ilonga mei he ‘enau ngaahi fehu‘i fakakikihi ko ‘enau faka-fepaki‘i ‘a e fakakaukau ‘a e palesitení.

Na‘e fehu‘i ‘e he faiongoongo kia Trump, “‘Oku ke pehé ko e kau mate ‘e toko fiha mei he mahakí teke fiemālie ki ai?” Ko e kalasi fehu‘i tauhele ‘oku nau fai ke fakamāa‘i e palesitení.

Taliange ‘e Trump, “Kau mate ‘e toko 0. Kā ‘oku tau feingá ketau mateuteu ki hono tau‘i ‘o e mahakí.” Na‘á ne ta‘ofi ‘a e ngaahi puna vakapuna mei Siainá ‘i Sanuali 31. Lolotongá ia hono hopo‘i faka-falealeá ke fakahifo mei he palesitení. Pea na‘e fakamafola ‘e he mītiá mo e Paati Temokalatí ‘oku lau lanu ki Siaina ‘a e tāpuni ‘o e ngaahi folau vakapuná.

Na‘e kau mo Dr. Anthony Faucci – ko e Fale‘i Mo‘ui Lelei ki he palesitení – ‘i hono veuki e ngaahi fakamatala ‘a Trump ‘o puputu‘u ai e kau faiongoongó. Na‘e mahino ‘a ‘ene ta‘e-fiemālie ki he tu‘uaki ‘e he palesitení ke faka-‘aonga‘i e fo‘i‘akau haitolōkisī-kololokuiní te‘ekiai ke fakangofuá ‘e Faucci. Ka e mahino ‘a e faka-tu‘amelie ‘a e palesitení ke mo‘ui ai ha kakaí.

Kole Fakamolemole: The Lancet & NE Journal of Medicine

Hoko mo e faka-ongoongo kovi‘i ‘e he kau toketā ‘Amelika ‘e toko fā ‘a e haitolōkisī tokua na‘e ‘ikai paasi ‘i he ‘enau fakatotoló ‘o sivi‘i na‘e fai ‘i Mā‘asi. Pea nau pulusi ‘i he uike faka‘osi ‘o Mē ‘i he ongo makasini mo‘ui-lelei ongoongoa ko e The Lancet (Pilitānia) mo e New England Journal of Medicine (‘Amelika). Ka e pangó, na‘e ma‘u ‘a e kākā ‘a e kau toketā ‘e toko fā. Toki kole fakamolemole ai ‘a e ongo makasiní kā kuo ‘osi hoko e maumaú ki he haitolōkisī ‘i he ta‘ofi fakataimi ‘o e ngaahi sivi mo hono faka-‘aonga‘í ‘o a‘u ki he WHO ‘o e United Nations.

Na‘e kauatu mo e tohi lāunga ‘a e kau toketā ‘e 100 ‘oku nau lolotonga faka-‘aonga‘i ‘a e haitolōkisī. Na‘á nau fakamo‘oni ‘oku fakamo‘ui ‘e he haitolōkisī ‘a e kau fokoutua COVID-19. Pea kau ki hono vave ‘o e ake mo e mo‘ui lelei ‘a e kau puké.

Toki ‘iloange ‘i he ‘uluaki uike ‘o Suné na‘e ‘ikai kakato ‘a e sivi‘i ‘e ha kau mataotaó (peer reviewed) ‘a e fakatotolo ‘a e kau toketā ‘e toko fā. Na‘e mahalo‘i ai na‘á nau palani ke faka-fepaki‘i pea ta‘ofi ‘a e fo‘i‘akau haitolōkisī-kololokuiní ke tokolahi ai ‘a e kakai pekiá mei he COVID-19. Na‘e a‘u e maumaú ki he ta‘ofi ‘o e ngaahi fakatotoló, ngaahi fekumi, mo e ngāue ki hono faka-‘aonga‘i ‘o e haitolōkisī ‘i Mē.

‘Oku tukuaki‘i ‘e he kau poupou ‘o Palesiteni Trump ko e founga poupou fulikivanu eni ‘a e ngaahi fili ‘o e palesitení. Tokua ‘oku nau fiema‘u ke tokolahi ‘a e pekiá mei he mahakí koe‘uhi ke ngali kovi ‘a Palesiteni Trump ki he fili palesiteni ‘o e ta‘ú ni. Kaekehe kuo mo‘umo‘ua ‘a e ta‘u ‘e tolu eni ‘a e palesitení mo e toutou feinga‘i ‘e hono ngaahi filí ke liukava‘i mo e fehālaaki ‘enau laka feinga kākā kotoá.

Kuo ngofuamai ke faka-‘aonga‘i ‘e he kau toketá ‘a e fo‘i‘akau haitolōkisī-kololokuiní ‘o fio mo e ‘asifilōmaisiní (azithromycin) ki he COVID-19.

(Hokoatu ‘amui ‘a e kōlomu ‘Analaiso Mitiá ‘a Mokofisí, Konga XIV. ‘Oku fa‘u-tohi pea liliu lea ki he lea Tongá mo e lea Pilitāniá. Ko e ‘uluaki ‘ētita Polinisiá ‘o e BYU-Hawaii, Ke Alaka‘i, pea ma‘u B.Sci. mo e Setifikeiti Ta‘u-Ua Travel Industry Management; MBA mei he University of Phoenix-Arizona mo e pole ki he Doctor of Business Administration.)