Foaki Fakalangilangi MNZM kia Sulieti Burrows he ‘Ene Tou‘anga Faitonunga he ‘Aati mo e Ako Faka-Tonga Featured
Sulieti Fieme‘a Burrows ‘i tu‘a he Fale Pule‘anga ‘i Episomu ‘i ‘Okalani
25 Siulai, 2020. Na‘e kau ‘a Sulieti Fieme‘a Burrows ‘o Falevai mei he ‘Otumotulalo he Vava‘ulahi he New Year Honours 2020 ‘a ia ko e Fakalangilangi Ta‘u Fo‘ou 2020 ‘a Nu‘usila ko e ngaahi faka‘ilonga fakalangilangi kehekehe ‘oku foaki ki he kakai kehekehe ‘oku nau tou‘anga faimatekina he ngaahi mala‘e kehekehe ‘o hange ko e ako, ‘aati, pisinisi, politiki, mo e lotu.
Na‘e foaki ‘a e faka‘ilonga fakalangilangi ko e Memipa ‘o e Tu‘unga Lavame‘a ‘a Nu‘usila 2020 ‘oku ‘iloa ko e Members of The New Zealand Order of Merit (MNZM) ki a Sulieti tu‘unga he‘ene tou‘anga faitonunga he mala‘e ‘o e ‘aati mo e ako faka-Tonga na‘e foaki ‘e he Kovana-Seniale, Dame Patsy Reddy, he Fale Pule‘anga ‘i ‘Episomu, ‘Okalani, he aho Falaite 24 ‘o Siulai.
‘Oku lahi ‘a e ngaahi ‘aati ‘oku fai ‘e Sulieti ‘a ia ‘oku kau ai ‘a e nimamea‘a koka‘anga, nimamea‘a langata‘ovala, nimamea‘a langakiekie, mo e nimamea‘a tuikakala. ‘Oku fengaue‘aki vaofi ‘a Sulieti mo hono ‘ofefine ko e ‘atisi ko Tui Emma Gillies he‘ena ngaue‘aki ‘a e ngatu, feta‘aki, mo e kupesi. Kuo faka‘ali‘ali ‘ena ngaue lahi mo lelei he ngaahi fale faka‘ali‘ali ‘a‘ati mo toe fakatau ‘a e ngaahi ngaue lahi ‘e he ngaahi misiume ‘oku lotolotonga tauhi malu mo fakatolonga ai.
Na‘e ma‘u ‘e Sulieti ‘a e faingamalie he 2015 ke kau fakataha mo e kau sikola mo e kau ‘atisi Tonga he folau ki he ngaahi konifelenisi faka‘ati fakavaha‘apule‘anga ‘a e Moana Pasifiki mo fekumi mo fakatotolo ki he ngaahi ‘aati faka-Tonga ‘oku tauhi mo tokanga‘i he ngaahi misiume lahi ‘i Pilitania mo ‘Iulope. Na‘e kau ai ‘a e misiume Museo de America ‘i Sepeni ‘a ia ‘oku tauhi mo tokanga‘i ai ‘a e ngaahi koloa lahi ko e ngaahi ‘aati tupu‘a ‘a Tonga.
Na‘e kau ai ‘a e helu ko e Palatavake, tano‘a, takohikohi, mo e ngatu launima ta‘uli na‘e momoi ‘e Tu‘i Tonga Pau mo Tupoumoheofo ki he ongo kaivai Sepeni ko Moelele he 1781 mo Malaspina he 1793 ‘i Vava‘ulahi. ‘Oku matamata na‘e foaki ‘a e ngatu launima ta‘uli ni ‘i Falevai, ‘a ia na‘e kau he fekumi mo e fakatotolo ‘a Sulieti ko e ma‘ungatala mohu mo fonu ki he‘ene nimamea‘a koka‘anga ka e tautefito ki hono ngaahi kupesi tupu‘a faka‘ofo‘ofa mo kinokinoifia.
