Tali halaia ki hono totongi fakafūfū 'o ha 'Ofisa Polisi ^Featured

 Na'e tali halaia pe foki 'a Ta'ai pea 'oku 'amanaki ke hilifaki hono tautea 'i he Fakamaau'anga 'i he 'aho 25 'o Sune 'o e ta'u ni ai pe.

Na'e tukuaki'i foki 'a Ta'ai ki hono totongi fakafufu ha 'ofisa polisi 'i he 'aho 3 'o Siulai 2019 lolotonga ia 'oku tauhi fakalao ia 'e he kau polisi.

Na'e hanga ai 'e Ta'ai 'o alea'i ,mo fokotu'utu'u ha tokotaha kehe kene 'ave 'a e puha moa, kapaulu pauni 6 mo e milemila kumala 'e 3 ki he 'api 'o e 'ofisa polisi kae malava ke fakafaingofua'i 'e he 'ofisa polisi hano tukuange 'o Ta'ai ke malu'i ki tu'a.

Na'e lipooti foki 'e he 'ofisa polisi 'a e ngaue ko'eni na'e fakahoko 'e Ta'ai ki he kau taki 'o e Potungaue Polisi pea na'e fakahoko ai 'a e fakatotolo makehe  ki he me'a ni 'o iku ai ki hono faka'ilo ko'eni 'o Ta'ai.

Na'e tauhi fakalao foki 'a Ta'ai 'o fekau'aki ia mo e faito'o konatapu 'a ia 'oku lolotonga 'i he Fakamaau'anga Polisi 'a e keisi ia ko'eni.